O‘zbekiston milliy terma jamoasi futbolchisi Jaloliddin Masharipov AQSHdagi yig‘in davomida bel qismidagi og‘riqlar sabab so‘nggi mashg‘ulotlarda hamda Kanada va Niderlandiyaga qarshi o‘rtoqlik uchrashuvlarida maydonga tusha olmadi.

Ma’lum qilinishicha, futbolchining bel qismidagi og‘riqlar so‘nggi haftalarda dori vositalari va fizioterapiya muolajalari yordamida vaqtincha yengillashgan. Biroq oradan ko‘p o‘tmay og‘riqlar yana qaytalangan. O‘tkazilgan MRT tekshiruvlari natijasida Jaloliddin Masharipovda umurtqalararo disk churrasi (disk churrasi) qayta zo‘raygani aniqlangan.

Hozirda futbolchining sog‘lig‘i O‘zbekiston milliy jamoasi tibbiy shtabi tomonidan nazorat qilinmoqda. Yakuniy tibbiy xulosalar olingach, uning holati bo‘yicha qo‘shimcha ma’lumot berilishi kutilmoqda.