Oliy sud Rayosati fuqarolik ishlari bo‘yicha sudlarda mehnat nizolarini ko‘rishga ixtisoslashgan sudyalar korpusini shakllantirish to‘g‘risida qaror qabul qildi. Unga ko‘ra, 2026 yil 1 avgustdan boshlab fuqarolik ishlari bo‘yicha sudlarning mavjud shtat birliklari doirasida mehnat nizolarini ko‘rishga ixtisoslashgan sudyalar faoliyati yo‘lga qo‘yiladi. Qarorga muvofiq: Oliy sudning Fuqarolik ishlari bo‘yicha sudlov hay’atida — 4 nafar; Qoraqalpog‘iston Respublikasi sudi, viloyatlar va Toshkent shahar sudlarida — 3 nafardan; Ayrim tumanlararo va shahar sudlarida esa 1 nafardan 2 nafargacha mehnat nizolariga ixtisoslashgan sudyalar faoliyat yuritadi.

Shuningdek, 2026 yil 1 avgustdan keyin sudlarga kelib tushgan mehnat nizolariga oid arizalar mazkur ixtisoslashgan sudyalar o‘rtasida taqsimlanadi. 2026 yil 31 iyulgacha kelib tushgan, shu jumladan ish yurituviga qabul qilingan ishlar esa avvalgi tartib asosida ko‘rib chiqilib, yakunlanadi.