Bolalarga zo‘ravonlik qilgan bog‘cha pedagoglariga 1 yil ishlash taqiqlanadi O‘zbekistonda bolalarga nisbatan jismoniy yoki ruhiy zo‘ravonlik sodir etgan pedagoglar bir yil davomida maktabgacha ta’lim tashkilotlarida ishlay olmaydi. Bu haqda 9-iyul kuni Senatning 17-yalpi majlisida ma’qullangan qonunda belgilandi. Qonunga ko‘ra, Ma’muriy javobgarlik to‘g‘risidagi kodeksga ta’lim-tarbiya jarayonida voyaga yetmaganlarga nisbatan jismoniy zo‘ravonlik qo‘llash yoki ularni haqorat qilish uchun ma’muriy javobgarlik belgilovchi normalar kiritilmoqda.

Shuningdek, pedagogik faoliyati davomida voyaga yetmaganlarga nisbatan jismoniy va (yoki) ruhiy zo‘ravonlik bilan bog‘liq huquqbuzarlik sodir etgani uchun ma’muriy javobgarlikka tortilgan shaxslar bir yil davomida maktabgacha ta’lim tashkilotlarida pedagogik faoliyat bilan shug‘ullana olmaydi. Qonun bilan yana bir qator yangi normalar ham joriy etildi. Jumladan, davlat yoki nodavlat muassasasining to‘liq ta’minotida bo‘lgan bola uchun ota yoki onani aliment to‘lashdan ozod qilishga yo‘l qo‘yilmaydi. Bundan tashqari, yetim bolalar hamda ota-ona qaramog‘idan mahrum bo‘lgan bolalarni oilaga tarbiyaga berish avvalo ularning qarindoshlariga amalga oshirilishi belgilandi. Senatorlar ta’kidlashicha, mazkur qonun bolalarning huquq va qonuniy manfaatlarini yanada ishonchli himoya qilish, ta’lim muassasalarida ularning sha’ni, qadr-qimmati va daxlsizligini ta’minlashga xizmat qiladi.