AQSh Prezidenti Donald Tramp Ukrainaga Patriot havo mudofaa tizimi uchun tutib qoluvchi raketalarni ishlab chiqarish litsenziyasi berilishi mumkinligini ma’lum qildi. Bu haqda u Anqarada o‘tayotgan NATO sammiti doirasida Ukraina Prezidenti Vladimir Zelenskiy bilan uchrashuvda aytdi. Trampning ta’kidlashicha, AQSh Ukrainaga Patriot raketalarini mahalliy ishlab chiqarish texnologiyasini taqdim etishi mumkin.

U buni hujum qurollaridan ko‘ra muhimroq deb baholab, Kiyev endi qurol yetkazib berish bo‘yicha shikoyat qilmasligini hazilomuz tarzda qayd etdi. Zelenskiy esa AQSh rahbari urushni tugatish yo‘lida muhim rol o‘ynashiga ishonishini bildirib, Vashingtonning qo‘llab-quvvatlovini yuqori baholadi. Trampning aytishicha, Ukrainaga ayrim tayyor Patriot raketalari yaqin vaqtda yetkazib berilishi mumkin.

Shu bilan birga, yangi raketalarni Germaniya yoki boshqa Yevropa davlatlarida ishlab chiqarish varianti ham ko‘rib chiqilmoqda. Ma’lumot uchun, Patriot tizimi Rossiyaning ballistik raketalarini to‘xtata oladigan eng samarali havo mudofaa tizimlaridan biri hisoblanadi. Unda qo‘llaniladigan raketalarning asosiy ishlab chiqaruvchisi Lockheed Martin, tizimning o‘zi esa Raytheon tomonidan ishlab chiqilgan.