Farg‘ona viloyatining Qo‘qon shahrida kuchli ta’sir qiluvchi dori vositalarining noqonuniy savdosi bilan shug‘ullangan shaxslar qo‘lga olindi. Bu haqda Ichki ishlar vazirligi ma’lum qildi. Qayd etilishicha, “Xavfsiz va sog‘lom yurt” tezkor-profilaktik tadbirining ikkinchi bosqichi doirasida o‘tkazilgan tezkor amaliyot davomida 1997-yilda tug‘ilgan, avval ikki marta sudlangan ayol va uning 2006-yilda tug‘ilgan qarindoshi yashash xonadonidan sotish maqsadida yashirilgan 400 dona “Tropikamid” hamda 14 dona “Regapen” dori vositalari aniqlandi.

Tezkor tadbirlar davomida ularning yana bir sherigi — 1993-yilda tug‘ilgan, ilgari sudlangan shaxs ham ushlandi. U boshqaruvidagi Gentra avtomobilidan tarqatish uchun olib ketilayotgan 600 dona “Tropikamid” topilib, ashyoviy dalil sifatida rasmiylashtirildi. Surishtiruvlarda gumonlanuvchi ushbu dori vositalarini besh yil davomida chet davlatdan kontrabanda yo‘li bilan olib kirib, noqonuniy tarqatib kelgani aniqlandi.

Natijada jami 12 514 dozaga teng 1000 dona “Tropikamid” va 14 dona “Regapen” dori vositalarining noqonuniy muomalaga chiqarilishining oldi olindi. Holat yuzasidan gumonlanuvchilarga nisbatan Jinoyat kodeksining 276⁶-moddasi 3-qismi “v” bandi bilan jinoyat ishi qo‘zg‘atilib, tergov harakatlari olib borilmoqda.