AQSh Prezidenti Donald Tramp NATO sammiti yakunlangach, Turkiyani Qatardan sovg‘a qilingan yangi Boeing 747 samolyotida emas, balki eski Boeing VC-25A (Air Force One) bortida tark etdi. Bu haqda u Truth Social ijtimoiy tarmog‘idagi sahifasida ma’lum qildi. Ma’lum qilinishicha, Tramp Anqaradan Buyuk Britaniyadagi RAF Mildenhall aviabazasiga eski Air Force One’da uchgan. Shundan so‘ng u Vashingtonga parvoz qilish uchun Qatardan sovg‘a qilingan yangi prezident samolyotiga o‘tgan. “Eski kunlarni yodga olish uchun tanladim”, — deb yozdi Tramp.

Uning ta’kidlashicha, yangi samolyot RAF Mildenhall bazasida qolib, u yerdagi AQSh harbiy xizmatchilari uni ko‘zdan kechirish imkoniga ega bo‘lgan. Anqaradagi matbuot anjumanida jurnalistlar Trampdan samolyotni almashtirgani Eron tomonidan bo‘lishi mumkin bo‘lgan suiqasd tahdidi bilan bog‘liqmi, deb so‘rashdi. AQSh prezidenti bunga aniq javob bermadi, biroq bunday ehtimolni ham inkor etmadi. “Eronning o‘ldirilishi kerak bo‘lganlar ro‘yxatida birinchi o‘rinda men turaman.

Bilmayman, bu haqda sizga aniq ayta olmayman, lekin menga baribir”, — dedi Tramp. Eslatib o‘tamiz, qiymati taxminan 500 million dollarga baholanayotgan Qatarning Boeing 747 samolyoti Tramp foydalanishi uchun vaqtinchalik Air Force One sifatida qayta jihozlangan. Mazkur samolyot zamonaviy aloqa tizimlari, mudofaa vositalari va prezident faoliyatini parvoz vaqtida ham davom ettirish imkonini beruvchi maxsus uskunalar bilan jihozlangan.