Toshkentda metropoliten xodimiga doimiy tahdid qilib, undan pul undirib kelgan shaxs hibsga olindi. Bu haqda “Toshkent metropoliteni” DUK xabar berdi.

Ma’lum bo‘lishicha, “Rejim tartibini ta’minlash” xizmati xodimlari tomonidan avval Jinoyat kodeksining 166- (talonchilik) va 169-moddalari (o‘g‘irlik) bilan sudlangan fuqaro M.A. “Harakat” xizmati “Qo‘yliq” bekati navbatchisi A.A.ning shaxsiy hayotiga tahdid qilgani va zo‘ravonlik yo‘li bilan uni qo‘rqitib, 500 ming so‘m miqdorida pul talab qilgani to‘g‘risida ma’lumot olingan. Shundan so‘ng O‘zbekiston Respublikasi IIV Metropolitenda xavfsizlikni ta’minlash boshqarmasi mas’ul xodimlariga xabar berilgan.

Murojaat natijasida kecha, 10-aprel kuni O‘zbekiston Respublikasi IIV Metropolitenda xavfsizlikni ta’minlash boshqarmasi xodimlari tomonidan “Toshkent metropoliteni” DUK “Rejim tartibini ta’minlash” xizmati bilan hamkorlikda o‘tkazilgan tadbirda fuqaro M.A. metropolitenning “Harakat” xizmati bekat navbatchisi A.A.dan “Qo‘yliq” metro bekatida tovlamachilik yo‘li bilan navbatdagi 500 ming so‘m pulni olgan vaqtda ashyoviy dalillar bilan qo‘lga olingan.

Xabarga ko‘ra, hozirda M.A. huquqni muhofaza qiluvchi organlar tomonidan hibsga olingan.

• IIV
• Jinoyat
• Metropoliten
• Toshkent
• bekat
• qo'yliq