Nepalning shimoliy hududlarida yuz bergan kuchli ko‘chki va undan kelib chiqqan sel oqibatida halok bo‘lganlar soni 1 127 nafarga yetdi. Bu haqda Nepal politsiyasi ma’lumotlariga tayanib, Xitoy Markaziy televideniyesi xabar berdi.

Ma’lumotlarga ko‘ra, yana qariyb 4 500 kishi bedarak yo‘qolgan deb hisoblanmoqda. Qidiruv-qutqaruv ishlari davom etmoqda.

Tabiiy ofat 26 avgust kuni Nepalning Xitoy bilan chegaradosh shimoliy qismida yuz bergan. Kuchli ko‘chki Rasuvagadi chegara punktidan taxminan 20 kilometr shimoli-sharqda sodir bo‘lgan.

Ko‘chki oqibatida hosil bo‘lgan tosh, loy va suv oqimi daryo o‘zani bo‘ylab yuqori tezlikda 70 kilometrdan ortiq masofaga tarqalgan. Natijada bir qator aholi punktlari vayron bo‘lgan, yo‘llar va infratuzilma jiddiy zarar ko‘rgan, katta hududlarni suv bosgan.

Qutqaruv guruhlari vayronalar ostida qolganlarni izlash va jabrlangan hududlarga yordam yetkazish ishlarini davom ettirmoqda. Rasmiy ma’lumotlarga ko‘ra, tabiiy ofat hududiga Nepal bilan birga Xitoy va Hindistondan ham qutqaruvchilar jalb qilingan.

Avvalroq Nepalning Nuvakot tumanidagi o‘rta maktab direktori Rajendra Davadi sel oqimidan o‘z maktabining 900 nafar o‘quvchisini qutqarib qolgani haqida xabar berilgan edi.