“Xitoy – Qirg‘iziston – O‘zbekiston” temiryo‘li loyihasini amalga oshirish uchun tuzilgan qo‘shma kompaniyada O‘zbekiston ulushining bir qismini shakllantirish uchun 255 mln dollar ajratilmoqda. 2024-yilning o‘zida esa 14 mln dollar ajratishi belgilangan.

Ushbu temiryo‘l “Qashg‘ar – Torugart – Makmal – Jalolobod – Andijon” yo‘nalishi bo‘ylab o‘tadi.

O‘zbekiston prezidentining qarori bilan “Xitoy – Qirg‘iziston – O‘zbekiston” temiryo‘li loyihasini birgalikda amalga oshirish bo‘yicha imzolangan hukumatlararo bitim tasdiqlandi.

Ushbu qarorga ko‘ra, temiryo‘l qurilishi bo‘yicha qo‘shma loyiha kompaniyasining ustav kapitalidagi O‘zbekiston hukumati ulushining bir qismini shakllantirish uchun 255 mln dollar ajratiladi.

Shuningdek, ushbu mablag‘ tiklanish va taraqqiyot jamg‘armasining krediti shaklida, 7 yillik imtiyozli davr bilan 15 yil muddatga, yillik 5 foiz stavkada “O‘zbekiston temir yo‘llari” AJga bosqichma-bosqich ajratilishi belgilangan.

Bundan tashqari, ushbu loyiha uchun, qonunchilik hujjatlarida taqiqlanmagan boshqa manbalardan ham mablag‘ yo‘naltirilishi ham qayd etilgan.

Bu koridorda tovarlarni yakuniy iste’molchilarga yetkazish muddati 7 kunga qisqarishi, yuk tashish hajmi esa yiliga 15 million tonnagacha yetishi ko‘zda tutilgan.

• Andijon
• Qirg‘iziston
• Temiryo‘l
• Xitoy