Prezident Shavkat Mirziyoyev yoqilg‘i-energetika sohasi investorlar bilan muloqotda umumiy quvvati 2 200 megavatt bo‘lgan 6 ta quyosh va shamol elektr stansiyasi loyihasi yaqin vaqtda ochiq tanlovga chiqarilishini ma’lum qildi.

Davlat rahbari dastlabki bosqichda «yashil» energetika quvvatlarini tez yaratish maqsadida loyihalar asosan investorlar taklif qilgan hududlarda joylashtirilganini qayd etdi. Bu katta miqdorda sarmoya jalb qilish imkonini bergan bo‘lsa-da, ayrim hududlarda elektr ishlab chiqarish quvvatlarining to‘planishi energiyani boshqa hududlarga yetkazish xarajatlarini oshirgan.

«Бизга алоҳида-алоҳида электр станциялари эмас, узвий боғланган энергетика тизими керак», — деди Президент.

Endilikda elektr energiyasiga bo‘lgan talab va zarur quvvatlar hududlar kesimida oldindan rejalashtiriladi. Tayyor loyihalar ochiq tanlov asosida investorlar o‘rtasida taqsimlanadi.

Tanlovga chiqariladigan har bir loyiha bo‘yicha yer maydoni, elektr tarmog‘iga ulanish nuqtasi va muddati, elektr energiyasini xarid qilish hamda to‘lov shartlari oldindan e’lon qilinadi. Barcha investorlar uchun teng talablar belgilanib, to‘lov intizomi va xatarlarni kamaytirish mexanizmlari mustahkamlanadi.

Davlat rahbari investorlarni umumiy quvvati 2 200 megavatt bo‘lgan 6 ta quyosh va shamol elektr stansiyasi loyihasi bo‘yicha bo‘lajak ochiq tanlovlarda ishtirok etishga taklif qildi.