Progressiv islohotlar markazi (PIM) O‘zbekiston viloyatlarining kompleks rivojlanish reytingini e’lon qildi. 2024-yil yakunlari bo‘yicha tuzilgan reyting natijalariga ko‘ra, Toshkent shahri, Navoiy va Buxoro viloyatlari uchlikka kirdi. Toshkent shahri 7 ta yo‘nalishdan 5 tasida birinchi o‘rinni egallab, umumiy reytingda yetakchilikni qo‘lga kiritdi. Reytingning oxirgi qismida esa Surxondaryo, Namangan va Jizzax viloyatlari qayd etildi. Xususan, Jizzax viloyati ta’lim yo‘nalishida eng past ko‘rsatkichlarni ko‘rsatdi.

Markaz tomonidan ishlab chiqilgan metodologiya 57 ta indikator asosida baholashni nazarda tutadi. U sog‘liqni saqlash, ta’lim, iqtisodiyot, infratuzilma, imkoniyatlar, jinoyatchilik va tabiiy muhit kabi yetti yo‘nalishni qamrab oladi. Har bir indikator bo‘yicha eng yaxshi ko‘rsatkich 100 ball, eng past ko‘rsatkich esa 0 ball sifatida baholangan. Reytingni tuzishda xalqaro tashkilotlar va OAV ma’lumotlaridan foydalanilgan bo‘lsa-da, ustuvorlik Statistika agentligi hamda tegishli vazirlik va idoralar ma’lumotlariga berildi.

Reyting natijalari — Sog‘liqni saqlash: Toshkent shahri 61,84 ball bilan yetakchi bo‘ldi. Jizzax viloyati ham 60,48 ball bilan ijobiy natija ko‘rsatdi. Biroq Sirdaryo va Toshkent viloyatlarida pediatrlar sonining yetishmasligi va xavfli kasalliklarning yuqoriligi muammo bo‘lib qolmoqda. — Ta’lim: Toshkent shahri 89,47 ball bilan birinchi o‘rinni egalladi. Buxoro va Sirdaryo ham yuqori ko‘rsatkichlarga erishdi. Jizzax (51,86 ball) va Qashqadaryo (56,54 ball) esa so‘nggi o‘rinlarda. Ayniqsa, Qashqadaryoda maktabgacha ta’lim qamrovi pastligi kelajakda inson kapitali rivojiga salbiy ta’sir ko‘rsatishi mumkin. — Iqtisodiyot: Poytaxt 98,21 ball bilan yetakchi. Sirdaryo va Surxondaryo viloyatlarida iqtisodiy faollik sust bo‘lib, yangi ish o‘rinlari yaratish va ishlab chiqarishni kengaytirish dolzarb masala bo‘lib qolmoqda. — Infratuzilma: Toshkent shahri (93,21 ball) va Toshkent viloyati (73,49 ball) yuqori o‘rinlarda. Surxondaryo (41,10 ball) va Jizzax (40,86 ball) infratuzilma bo‘yicha eng oxirgi o‘rinlarda qayd etildi. Bu hududlarda internet qamrovi va transport masalalari jiddiy muammo bo‘lib qolmoqda. — Imkoniyatlar: Toshkent shahri (91,63 ball) va Navoiy (81,74 ball) yetakchilik qildi. Jizzax (67,22 ball) va Surxondaryo (65,74 ball) past ko‘rsatkichlar qayd etdi. — Jinoyat va tuzatishlar: Sirdaryo viloyati 80,61 ball bilan yuqori natijani qayd etib, jinoyatchilikni kamaytirish borasida samarali ish olib borayotganini ko‘rsatdi. Xorazm va Toshkent shahrida esa bu boradagi ko‘rsatkichlar past. — Tabiiy muhit: Surxondaryo 87,48 ball bilan yetakchi bo‘ldi. Namangan va Jizzax viloyatlarida esa ekologik muhit past ko‘rsatkichlarni qayd etdi.

Tahlillar shuni ko‘rsatadiki, mamlakatimizda ijtimoiy-iqtisodiy taraqqiyot sur’atlari hududlar kesimida keskin farqlanadi. Toshkent shahri ko‘plab yo‘nalishlarda yetakchilik qilgan bo‘lsa-da, ayrim viloyatlar ham sezilarli yutuqlarga erishmoqda. Shu bilan birga, Jizzax, Surxondaryo va Namangan viloyatlarida ayrim sohalarda sustkashlik kuzatilmoqda. Mutaxassislar fikricha, mazkur reyting oddiy raqamlar to‘plami emas, balki hududlarning ichki imkoniyatlarini ochib beruvchi muhim ko‘rsatkichdir. 

Ushbu havola orqali to‘liq viloyatlar kompleks reytingi bilan tanishishingiz mumkin.

• Poytaxt
• Toshkent
• reyting
• viloyat