IDP test markazi xabariga ko‘ra, 11-iyuldan boshlab O‘zbekistonda IELTS imtihonini qog‘ozda topshirish (paper based) imkoniyati bekor qilinadi. Endilikda test faqat kompyuterda topshiriladigan bo‘ladi.

10-iyul kuni bo‘lib o‘tadigan imtihonlar qog‘ozda ishlash amal qiladigan so‘nggisi bo‘ladi. Yuqoridagi o‘zgarish IDP, British Council, Cambridge University Press & Assessment imtihonlariga ham amal qiladi. Qog‘ozda topshirish bekor qilinishi operativ sabablar bilan izohlanmoqda. Shu sababli, Edu-Action Exams markazi 10-iyuldan keyingi imtihonlar uchun ro‘yxatdan o‘tganlarga ikkita variantni taklif etadi. Sababi ularning registratsiyasi avtomatik tarzda bekor qilinadi.

1. IELTS imtihoni formatini kompyuter shakliga bepul o‘tkazish;

2. Pulni to‘liq qaytarish.

So‘nggi oylarda qog‘ozda topshiriladigan IELTS imtihonlarining “javoblari testdan oldin tarqab ketgan” holatlar kuzatilgandi. Shu sababli IDP test markazi 7-iyun kuni bo‘lib o‘tgan imtihon javoblarini qayta tekshirgandi. Ular ichidan ishonchli bo‘lmagan natijalar ajratib olinib alohida tekshirishga yuborilgandi. Odatda kompyuterda topshiriladigan IELTS javoblari 1-5 kun ichida, qog‘ozda topshiradiganlarniki esa 13 kun ichida e’lon qilinadi. Biroq 7-iyun kuni topshirganlarning natijasi 24-iyun kuni chiqqan edi.

IELTS — ingliz tilini bilish darajasini aniqlovchi xalqaro test tizimi. Har yili butun dunyo bo‘yicha 4 milliondan ortiq kishi bu imtihonni topshiradi. IELTS oliy ta’lim va global migratsiya uchun ingliz tilini bilish bo‘yicha dunyodagi eng mashhur test hisoblanadi.

U butun dunyo bo‘yicha 140 dan ortiq davlatdagi 12 500 dan ortiq tashkilot tomonidan e’tirof etilgan. Imtihon tinglab tushunish (Listening), o‘qish (Reading), yozish (Writing) va gapirish (Speaking) ko‘nikmalarini baholaydi.

• IELTS