2025-yil 17-noyabrda Toshkentdagi “Renessans” kino uyida Milliy statistika tizimidagi islohotlarga bag‘ishlangan “Milliy statistikada yangi bosqich: shaffoflik va xalqaro standartlar sari” xalqaro konferensiya va matbuot anjumani bo‘lib o‘tdi.

Tadbirda Jahon banki, XVJ, BMTning UNFPA va FAO vakolatxonalari, vazirlik va idoralar, xalqaro ekspertlar hamda OAV vakillari qatnashdi.

Konferensiyada Milliy statistika qo‘mitasi raisi Behzod Hamrayev yangi aniqlangan hajmlarni aks ettirish maqsadida yalpi ichki mahsulotni qayta hisoblash natijalari borasida ma’lumot berdi.

Unda ta’kidlanishicha, yakuniy hisob-kitoblarga ko‘ra, 2024-yil yakuni bilan respublika yalpi ichki mahsulotining nominal hajmi amaldagi 1 454,6 trln so‘mdan 1 535,4 trln so‘m (80,9 trln so‘m)ga yoki 5,6 foizga ortgan.

YAIM AQSh dollari hisobida 115,0 mlrd dollardan 121,4 mlrd dollarga yetgan.

Shuningdek, qayta hisoblashdan so‘ng, 2024-yilda aholi jon boshiga YAIM hajmi 41,3 mln so‘mni tashkil etgan.

2024-yil uchun davlat byudjeti ijrosining to‘liq qamrovi ta’minlanishi natijasida 36,4 trln so‘m yangi qo‘shilgan qiymat aniqlangan.

Sanoat sohasi bo‘yicha 2024-yil uchun qo‘shilgan qiymat hajmi 12,7 trln so‘mga oshishi kuzatilgan. Shuningdek, qishloq xo‘jaligida 5,6 trln so‘m, qurilishda 10,3 trln so‘m va xizmatlar sohasida 16,3 trln so‘m miqdorida yalpi qo‘shilgan qiymat qo‘shimcha hisoblangan.

• O‘zbekiston
• Yalpi ichki mahsulot
• statistika