Turkiyaning Istanbul shahrida ikki o‘zbekistonlik ayolni o‘ldirish va ularning jasadlarini bo‘laklarga ajratish ishida sud hukmi o‘qildi. Sud Dilshod Turdimurodov va G‘ofurjon Kamolxo‘jayevni ikki nafar ayolni qasddan o‘ldirishda aybdor deb topib, har birini ikki marta og‘irlashtirilgan umrbod qamoq jazosiga hukm qildi.

Sud qaroriga ko‘ra, sudlanuvchilar “qasd bilan, vahshiylik yoki qiynoq bilan o‘ldirish” jinoyatini sodir etgan. Shuningdek, marhumlarning o‘limidan foydalanib, xonadondan mol-mulk o‘g‘irlagani uchun har biriga qo‘shimcha ravishda ikki marta 7 yilgacha ozodlikdan mahrum qilish jazosi tayinlangan.

Ish materiallariga ko‘ra, 36 yoshli Durdona Hakimova va 32 yoshli Sayyora Ergashaliyeva Istanbulning Umraniye tumanida o‘ldirilgan. Sayyoraning yaqinlari 23 yanvardan boshlab undan xabar ololmagach, politsiyaga murojaat qilgan.

Tergov davomida Sayyora Durdona yashagan xonadonda bo‘lgani aniqlangan. Kuzatuv kameralaridagi yozuvlarda esa 23 yanvar kuni Dilshod Turdimurodov va G‘ofurjon Kamolxo‘jayev ham ushbu xonadonga kirgani qayd etilgan.

Keyingi kuni ikki erkak uydan bir necha marta qora chiqindi paketlari va oq chamadon bilan chiqib ketgani aniqlangan. Oradan vaqt o‘tib, Istanbulning turli tumanlaridagi chiqindi konteynerlaridan inson jasadining bo‘laklari topilgan.

Sudda G‘ofurjon Kamolxo‘jayev Sayyorani diniy nikohdagi turmush o‘rtog‘i bo‘lganini va uni “nomus masalasi” sabab yolg‘iz o‘zi o‘ldirganini bildirgan. U Durdonaning o‘limi haqida ma’lumotga ega emasligini aytgan.

Dilshod Turdimurodov esa Durdonani “nomus masalasi” sabab o‘ldirganini tan olgan. Shuningdek, uning jasadini bo‘laklarga ajratganini ma’lum qilgan.

Ayblov xulosasida esa ikki sudlanuvchi jinoyat vaqtida birgalikda harakat qilgani qayd etilgan. Unga ko‘ra, ular avval Sayyorani pichoqlab o‘ldirgan va jasadini bo‘laklarga ajratgan. Keyinchalik Durdona ham o‘ldirilib, uning jasadi ham xonadondan olib chiqib ketilgan.

Sud hay’ati har ikki sudlanuvchiga ikki martadan og‘irlashtirilgan umrbod qamoq jazosi hamda o‘g‘rilik uchun qo‘shimcha jazolar tayinladi.