Turkiyada “Oilam himoyada” (Ailem Güvende) operatsiyasi doirasida 162 nafar gumondor, 9 ta uyushma va 13 ta kompaniyaga nisbatan huquqiy choralar ko‘rilmoqda. Bu haqda mamlakat adliya vaziri Akin Gurlek ma’lum qildi.

Operatsiya Istanbul, Anqara, Izmir, Aydin va Mersin prokuraturalarining muvofiqlashtiruvi ostida xavfsizlik kuchlari hamda jandarmiya hamkorligida olib borilmoqda. Tadbirlar jami 15 ta viloyatni qamrab olgan.

Tergov doirasida fohishalik bilan shug‘ullanganlikda gumon qilinayotgan shaxslar, shuningdek, bunday faoliyat uchun sharoit yaratgan korxonalar o‘rganilmoqda.

Bundan tashqari, axloqqa zid materiallarni, jumladan, bolalar ishtirokidagi noqonuniy kontentni tayyorlash va tarqatishda gumon qilinayotgan shaxslar ham tekshirilmoqda.

Tezkor tadbirlar davomida yashirin kuzatuv, raqamli ekspertiza va guvohlarning ko‘rsatmalaridan foydalanilgan. Bir vaqtning o‘zida gumondorlarni qo‘lga olish, tintuv o‘tkazish va ashyoviy dalillarni musodara qilish ishlari amalga oshirilgan.

Shuningdek, ayrim uyushmalar va faollarning ijtimoiy tarmoqdagi akkauntlari hamda veb-saytlariga kirish cheklangan.