LOTINCHA

Prezident Shavkat Mirziyoyevning O‘zbekiston va Koreya hamkorligiga bag‘ishlangan maqolasi e’lon qilindi

Koreya Respublikasining yetakchi nashrlaridan biri — The Chosun Dailyda Prezident Shavkat Mirziyoyevning “O‘zbekiston va Koreya Respublikasi: o‘zgarishlar davrida kelajak sari intilayotgan hamkorlik” nomli maqolasi e’lon qilindi.

Maqolada ikki mamlakat o‘rtasidagi tarixiy rishtalar, strategik sheriklik, savdo-investitsiya aloqalari hamda hamkorlikni yangi texnologik bosqichga olib chiqish istiqbollari haqida so‘z yuritilgan.

Qayd etilishicha:

— so‘nggi yillarda O‘zbekiston va Koreya o‘rtasidagi ikki tomonlama savdo hajmi 5 barobarga oshgan;
— Koreyaning O‘zbekiston iqtisodiyotiga kiritgan investitsiyalari 8 milliard dollardan oshgan;
— ayni paytda mamlakatimizda Koreya kapitali ishtirokida 700 dan ziyod qo‘shma korxona va loyihalar amalga oshirilmoqda;
— KOICA, Koreya Eksimbanki va EDCF bilan hamkorlikdagi loyihalarning umumiy portfeli 3,5 milliard dollardan ortiqni tashkil etadi;
— 2025-yilda Markaziy Osiyo davlatlarining umumiy yalpi ichki mahsuloti 500 milliard dollardan oshgan.

Prezident ikki mamlakat iqtisodiyotining o‘zaro to‘ldiruvchanligi yangi o‘sish drayverlarini yaratish uchun katta imkoniyat berishini ta’kidlagan. Shuningdek, hamkorlikni umumiy ishlab chiqarish tizimlari, texnologik platformalar va yangi bozorlarni shakllantirish darajasiga olib chiqish muhimligi qayd etilgan.

Maqolada sun’iy intellekt, yarimo‘tkazgichlar, robototexnika, elektr transport vositalari, biofarmatsevtika, aqlli qishloq xo‘jaligi va “aqlli shaharlar” istiqbolli hamkorlik yo‘nalishlari sifatida ko‘rsatilgan.

Bundan tashqari, ta’lim va inson kapitaliga investitsiya kiritish, akademik almashinuv hamda qo‘shma ilmiy tadqiqotlarni kengaytirish muhimligi ta’kidlangan.

Prezident, shuningdek, “Markaziy Osiyo — Koreya Respublikasi” sammiti nafaqat O‘zbekiston va Koreya o‘rtasidagi, balki butun mintaqa bilan hamkorlikni yangi bosqichga olib chiqish uchun muhim platforma ekanini qayd etgan.

Maqolada O‘zbekiston ushbu format doirasida siyosiy muloqotni chuqurlashtirish, amaliy hamkorlikni kengaytirish va sheriklikning yangi mexanizmlarini shakllantirishga qaratilgan tashabbuslarni ilgari surishi qayd etilgan.

Prezident Shavkat Mirziyoyevning ta’kidlashicha, O‘zbekiston va Koreya Respublikasi o‘rtasidagi strategik sheriklik nafaqat ikki tomonlama munosabatlarni, balki Markaziy Osiyoda tinchlik, barqarorlik, innovatsiya va umumiy taraqqiyot uchun yangi imkoniyatlarni shakllantirishga xizmat qilmoqda.

Ma’lumot uchun: The Chosun Daily — 1920-yilda tashkil etilgan “Chosun Ilbo” mediaguruhi tarkibidagi nashr bo‘lib, Koreya Respublikasidagi yirik axborot platformalaridan biri hisoblanadi.