AQSh Prezidenti Donald Tramp Las-Vegas shahrida bo‘lib o‘tgan tadbirda mamlakatga noqonuniy muhojirlar oqimi to‘xtatilganini ma’lum qildi.

Uning so‘zlariga ko‘ra, prezidentlik faoliyatining dastlabki 30 kunida AQSHga millionlab noqonuniy muhojirlarning kirib kelishiga chek qo‘yilgan. Tramp janubiy chegara orqali 25 millionga yaqin kishi mamlakatga kirishga uringanini ta’kidlab, bu holatning oldi olinganini aytdi.

Shuningdek, u so‘nggi 15 oy davomida AQSH hududiga birorta ham noqonuniy muhojir kirmaganini hamda ma’muriyati “muhojirlar jinoyatchiligi”ga qarshi qat’iy kurash olib borayotganini bildirdi.

Tramp o‘z nutqida Ispaniyada yuz bergan voqealarni ham misol qilib keltirib, ko‘plab muhojirlar chegarani kesib o‘tishga uringani va tartibsizliklar sodir bo‘lganini tilga oldi. Uning fikricha, bunday vaziyat AQSHda yuz berishiga yo‘l qo‘yilmaydi.

Bundan tashqari, AQSH Prezidenti Immigratsiya va bojxona nazorati xizmati (ICE) xodimlarining noqonuniy muhojirlarni aniqlash va deportatsiya qilish bo‘yicha faoliyatini qo‘llab-quvvatlashini bildirib, huquqni muhofaza qiluvchi organlar har doim davlat himoyasida bo‘lishini ta’kidladi.