16-sentyabr kuni Toshkent viloyati Parkent tumani, “Xoʻja” mahallasi, Hunarmand koʻchasi 47-uyda yashovchi Nasiba Begmatova uyidan oʻra qazdirayotganda mis tangalar topgan va bu haqda mutaxassislarga xabar bergan.

Holatni oʻrganish uchun Oʻzbekiston Respublikasi Fanlar Akademiyasi Milliy arxeologiya katta ilmiy xodimi Dilmurod Normurodov va bir qancha arxeologiya mutaxassislari jalb qilingan. Maʼlum boʻlishicha, tangalar soni 939 ta boʻlib, ularning XVI asr oxiri va XVII asr boshlariga oid ekanligi aniqlangan.

Mis tangalar topilgan joyning oʻzida koʻzdan kechirilib, ularning diametri 115 santimetr boʻlgan oʻraning yer sathidan 40-50 santimetr chuqurligida, bir joyda toʻplangan holda topilganligi, tangalar topilgan joydagi tuproq orasidan oʻlchami 25x25x5 santimetr boʻlgan pishiq gʻisht boʻlagi, moviy rangda sirlangan va sirsiz idishlarning mayda parchalari saqlanganligi aniqlangan.

Tangalarni oʻrganish davomida ular yillar mobaynida nam tuproqqa qorishib chiriganligi va buning oqibatida ikki tomonining biroz tekislangani, tangalarda arab alifbosidagi yozuvlar mavjudligi maʼlum boʻlgan.

Tangalar bilan birga 25x25x5 santimetr hajmdagi pishgan gʻishtlar, moviy rangdagi sirlangan va sirsiz sopol idish siniqlari ham ashyoviy dalil sifatida qayd etilgan.

• Arxeologiya
• Xazina