Prezident tibbiyot xodimlari kuni munosabati bilan ularga tabrik yo‘lladi. Bu haqda Prezident matbuot xizmati xabar berdi.

“Ushbu qutlug‘ ayyomda xalq salomatligining posbonlari bo‘lgan siz, azizlarni mamlakatimizda keng nishonlanayotgan kasb bayramingiz – Tibbiyot xodimlari kuni bilan chin qalbimdan tabriklab, barchangizga o‘zimning yuksak hurmatim va ezgu tilaklarimni izhor etaman”, deyiladi tabrik matnida.

Prezident matbuot xizmatiga ko‘ra, 2017-yildan buyon onalar o‘limi ko‘rsatkichi 21 promilledan 11 promillega, go‘daklar o‘limi esa 11,5 promilledan 7,8 promillega kamaygan. Tabrikda, shuningdek, ilgari faqat poytaxtda ko‘rsatilgan 400 dan ziyod yuqori texnologik tibbiy xizmatlar hozirgi vaqtda viloyat va tumanlarning o‘zida ham amalga oshirilayotgani aytilgan.

Prezident Shavkat Mirziyoyev tibbiyot xodimlariga malaka va mahorati bilan soha rivojini yangi bosqichga ko‘tarish, O‘zbekiston tibbiyotining an’analarini izchil davom ettirish, jahon tibbiyotining ilg‘or yutuqlarini o‘zlashtirishi uchun ishonch bildirgan.

Davlat rahbarining ta’kidlashicha, soha xodimlarining xizmatlarini munosib qadrlash, ular uchun har tomonlama qulay sharoitlar yaratib berish masalalari davlat va jamiyatning e’tibor markazida bo‘ladi.

“Sizlarni kasb bayramingiz bilan yana bir bor muborakbod etib, barchangizga sihat-salomatlik, ish faoliyatingizda ulkan muvaffaqiyatlar, oilaviy baxt-saodat, xonadonlaringizga tinchlik va fayz-u baraka tilayman”, deyiladi tabrik yakunida.

• Bayram
• Prezident
• Shifokor
• Tabrik
• Tibbiyot