Saudiya Arabistoni Makka shahri tomon uchirilgan husiylarga tegishli dronni urib tushirdi. Bu haqda Reuters Saudiya boshchiligidagi Yamandagi harbiy koalitsiya vakili Turki al-Malikiyga tayanib xabar berdi.

Qayd etilishicha, dron muqaddas shahar ustidagi taqiqlangan havo hududiga kirishidan avval yo‘q qilingan. Koalitsiya vakili Makka xavfsizligi “qizil chiziq” ekanini ta’kidlagan.

Saudiya Arabistoni 15-sentyabr kuni Makka xavfsizligi bo‘yicha ogohlantirish e’lon qilgan. Husiylarning siyosiy byurosi a’zosi Muhammad al-Farah esa shaharga hujum uyushtirilganini rad etib, bu haqdagi xabarlarni “mutlaqo yolg‘on” deb atagan.

So‘nggi kunlarda husiylar Saudiya Arabistoniga bir necha bor hujum uyushtirganini ma’lum qilgan. Ular buni Yamanga berilgan aviazarbalarga javob sifatida izohlagan.

Mintaqadagi hujumlar Saudiya Arabistonining neft eksport yo‘llariga ham xavf tug‘dirmoqda. Xususan, Hormuz bo‘g‘ozidagi vaziyat sabab qirollik neft eksportida muqobil yo‘nalishlardan foydalanishga urinmoqda.