Joriy yil, 11-fevralda “Skeyt Oʻzbekiston” assotsiatsiyasi rasman davlat roʻyxatidan oʻtdi.

Qayd etish mumkin, Oʻzbekistonda skeytbording va roller sport turlarini rivojlantirish maqsadida 2021-yil 9-noyabr kuni “Skeyt Oʻzbekiston” assotsiatsiyasini taʼsis etish boʻyicha tashabbuskor guruhning taʼsis Konferensiyasi oʻtkazilgan edi.

Soha mutaxassislari, “Skeyt Oʻzbekiston” assotsiatsiyasini tashkil etish uchun tashabbuskorlar guruhi hamda MOQ vakillari ishtirok etgan konferensiyada:

- “Skeyt Oʻzbekiston” assotsiatsiyasi nomi bilan yangi sport tashkilotini tuzish;

- “Skeyt Oʻzbekiston” assotsiatsiyasining Ustavini tasdiqlash;

- “Skeyt Oʻzbekiston” assotsiatsiyasining raisi, oʻrinbosarlari va bosh kotibni saylash.

Shundan soʻng, “Skeyt Oʻzbekiston” assotsiatsiyasi raisi etib bir ovozdan Ahmedov Aziz Gʻayratovich hamda bosh kotib etib Usmonov Kamol Hoshim oʻgʻli saylangan.

Bugungi kunda zamonaviy Olimpiya oʻyinlarining 28 ta sport turi boʻyicha 42 ta yoʻnalishi Oʻzbekistonda mavjud.

Skeytbordingning vatani AQSh hisoblanib, “American Sports Data” maʼlumotlariga koʻra, bugungi kunda dunyo boʻyicha 23 milliondan ortiq yoshlar skeytbording va roller sport turlari bilan muntazam ravishda shugʻullanib kelmoqda.

Skeytbording qatnashchilarining soni boʻyicha dunyoda eng mashhur sport turlari orasida 6-oʻrinni egallaydi. 2020-yildan boshlab u yozgi Olimpiya oʻyinlari dasturiga rasman kiritildi.

Roller sporti esa bir nechta sport turining umumiy nomi boʻlib, bunda sportchi rolikli konkidan foydalanadi. Oʻz navbatida, u Osiyo oʻyinlari dasturiga kiritilgan, ushbu sport turini ham yozgi Olimpiya oʻyinlari dasturiga kiritish boʻyicha amaliy choralar boshlab yuborilgan.

Ayni paytga kelib “World Skate” assotsiatsiyasi tarkibiga 160 dan ortiq davlat aʼzo sifatida kirgan va hozir ham faoliyat olib bormoqda. Ahamiyatlisi, bugungi kunda Oʻzbekiston va “World Skate” assotsiatsiyasi oʻrtasida hamkorlik aloqalari yoʻlga qoʻyilgan.

Maʼlumot uchun, 2021-yilda skeytbordingning ikki yoʻnalishi Tokio-2020 yozgi Olimpiya oʻyinlari dasturiga kiritildi. Ushbu sport turi 2024-yilda Parijda boʻlib oʻtadigan yozgi Olimpiya oʻyinlari dasturidan ham joy olgan.

Sobiq Ittifoq mamlakatlari orasida skeytbording va roller sporti federatsiyalari faqat Armaniston, Ozarbayjon, Belarus, Gruziya, Qozogʻiston, Moldova, Rossiya va Ukrainada ochilgan ekan. Endi ular safiga Oʻzbekiston ham qoʻshildi.

Maʼlum qilinishicha, bugungi kunda zamonaviy Olimpiya oʻyinlarining 28 ta sport turi boʻyicha 42 ta yoʻnalishi Oʻzbekistonda mavjud boʻlib, faqatgina ikkita sport turi, yaʼni Skeytbording va Syorfing respublika roʻyxatidan oʻtmagan.

• Assotsiatsiya
• O‘zbekiston
• Sport