Futbol bo‘yicha O‘zbekiston milliy terma jamoasi va Turkiyaning “Bashakshehir” klubi hujumchisi Eldor Shomurodov faoliyatini Superliganing boshqa bir jamoasida davom ettirishi mumkin. Bu haqda Fotospor.com xabar berdi.

Manbaga ko‘ra, “Fenerbahche” chempionat doirasida o‘zining ajoyib o‘yini bilan ajralib turgan Shomurodov bo‘yicha “Bashakshehir” bilan bog‘langan. Klub prezidenti Go‘ksel Gumushdog esa futbolchining transfer huquqi uchun 20 million yevro talab qilgan.

“Bashakshehir” hujumchini “Roma”da sotib olish uchun jami 5,7 million yevro sarflagandi. Shuningdek, futbolchining keyingi transferidan olinadigan foydaning 10 foizi Rim jamoasiga beriladi.

Eldor Shomurodov joriy mavsum “Bashakshehir” safida Turkiya chempionati doirasida 20 ta uchrashuvda maydonga tushib, 14 ta gol va 4 ta assist qayd etgan.

• Eldor Shomurodov
• Futbol
• Transferlar
• Turkiya