AQShda genetik jihatdan o‘zgartirilgan cho‘chqadan ko‘chirib o‘tkazilgan buyrak inson organizmida 271 kun davomida faoliyat ko‘rsatdi. Bu hozirgacha cho‘chqa buyragining inson tanasida eng uzoq ishlagan holati hisoblanadi.

Buyrak 2025-yil 25-yanvar kuni 66 yoshli Tim Endryusga ko‘chirib o‘tkazilgan. U 2-tur qandli diabet bilan bog‘liq terminal bosqichdagi buyrak yetishmovchiligidan aziyat chekkan.

Transplantatsiyadan so‘ng buyrak darhol ishlay boshlagan va bemor bir necha oy davomida dializga muhtoj bo‘lmagan. Biroq taxminan olti oy o‘tgach, organning qon tomirlarida shikastlanish va yallig‘lanish rivojlangan. Keyinchalik buyrak faoliyatini yo‘qota boshlagani sababli u olib tashlangan.

Tadqiqotchilar oddiy cho‘chqa buyragidan emas, balki genetik jihatdan o‘zgartirilgan Yucatan miniatyura cho‘chqasining buyragidan foydalangan. Uning genomiga 69 ta genetik o‘zgartirish kiritilgan bo‘lib, bu inson immun tizimining organni rad etish xavfini kamaytirish va organ mosligini oshirishga qaratilgan.

Mutaxassislar ushbu natijani ksenotransplantatsiya sohasidagi muhim qadam deb baholamoqda. Kelajakda bunday organlar inson donoridan buyrak kutayotgan bemorlar uchun vaqtinchalik “ko‘prik” vazifasini bajarishi mumkin.

Keyinchalik Endryusga inson donoridan buyrak ko‘chirib o‘tkazilgan va yangi organ yaxshi faoliyat ko‘rsatayotgani qayd etilgan.