Fransiya poytaxti Parijda o‘tkazilgan UFC Fight Night turnirida o‘zbekistonlik MMA jangchisi Nursulton Ro‘ziboyev britaniyalik Maykl “Venom” Peyjga qarshi oktagonga ko‘tarildi.

O‘rta vazn toifasidagi reyting jangi uch raundga mo‘ljallangan bo‘lib, to‘liq davom etdi. Birinchi raundning dastlabki soniyalarida Ro‘ziboyev raqibini parterga olib o‘tdi va raund yakuniga qadar uni nazorat qildi.

Ikkinchi raundda jang asosan tik turgan holatda kechdi. Har ikki jangchi zarbalar berishga uringan bo‘lsa-da, ularning aksariyati aniq nishonga tegmadi.

Hal qiluvchi uchinchi raundda esa Peyj faollikni oshirdi. Yakunda uchala hakam ham jangni 29:28 hisobida britaniyalik sportchi foydasiga baholadi.

Bu Ro‘ziboyevning MMA faoliyatidagi 9-mag‘lubiyati bo‘ldi. O‘zbekistonlik jangchi hisobida 37 ta g‘alaba va 2 ta durang ham mavjud.

Shuningdek, Ro‘ziboyev UFC’dagi yettinchi jangida ikkinchi bor mag‘lubiyatga uchradi. Uning promoushendagi rekordi 5 ta g‘alaba va 2 ta mag‘lubiyatdan iborat.