Migratsiya agentligi ma’lumotiga ko‘ra, Rossiyada qiyin vaziyatga tushib qolgan 597 nafar O‘zbekiston fuqarosi vatanga qaytarildi. Ular orasida 110 nafar ayol va 228 nafar voyaga yetmagan shaxs bor.

Joriy yilning iyul oyida Moskva shahridagi vakolatxonaga murojaat qilgan jami 774 nafar fuqaroga ijtimoiy, huquqiy va amaliy yordam ko‘rsatildi. Jumladan, 91 nafarga bir martalik moddiy yordam ajratildi, 83 nafar boshpanasiz qolgan fuqaro bir oy muddatga bepul xostelga joylashtirildi.

Bundan tashqari, og‘ir kasallikka chalingan 3 nafar migrantning davolanish xarajatlari qisman qoplab berildi. Bir oy davomida 860 nafar murojaatchiga huquqiy va amaliy yordam ko‘rsatildi. Xususan, 64 nafar fuqaroning 4 million rubl miqdoridagi ish haqi undirib berildi, 53 nafarga O‘zbekistonga qaytish guvohnomasi rasmiylashtirildi, 31 nafar fuqaroning ish beruvchi tomonidan olib qo‘yilgan shaxsini tasdiqlovchi hujjatlari qaytarildi.

Shuningdek, ishsiz qolgan 220 nafar O‘zbekiston fuqarosi 7 ta korxonaga ishga joylashtirildi, 712 nafar migrantga huquqiy maslahatlar berildi.

Avvalroq, joriy yilning birinchi yarmida Rossiyaga ishlash maqsadida borgan xorijliklar orasida O‘zbekiston fuqarolari eng ko‘p sonni tashkil etgani haqida xabar berilgandi.