Xalq demokratik partiyasi (XDP) Toshkent viloyati Chinoz tumani hokimining obodonlashtirilmagan hududlarga “Sharmandali mahalla”, ayrim xonadonlarga esa “Uyatli xonadon” yozuvlarini o‘rnatish bo‘yicha bergan topshirig‘i yuzasidan munosabat bildirdi.

Partiya bunday amaliyot fuqarolarning sha’ni, qadr-qimmati, shaxsiy hayoti va uy-joy daxlsizligi kabi Konstitutsiyada kafolatlangan huquqlariga zid ekanini ta’kidladi. XDPga ko‘ra, xonadonlar va mahallalarni obod qilish muhim tashabbus bo‘lsa-da, bu jarayon fuqarolarni kamsitish yoki tamg‘alash orqali emas, balki qonuniylik, hamkorlik va amaliy ko‘mak asosida amalga oshirilishi lozim.

Shuningdek, partiya mahallalarning obodligi yo‘llar, ichimlik suvi, elektr va gaz ta’minoti, muhandislik kommunikatsiyalari hamda chiqindilarni o‘z vaqtida olib chiqish kabi xizmatlarning sifatli tashkil etilishiga ham bog‘liqligini qayd etdi. Shu bois, mahalliy hokimliklar va mas’ul tashkilotlar o‘z zimmasidagi vazifalarni o‘z vaqtida va sifatli bajarishi zarurligi ta’kidlandi.

XDP inson sha’ni va qadr-qimmatini kamsituvchi, qonunchilikda nazarda tutilmagan usullarni qo‘llash demokratik huquqiy davlat tamoyillariga zid ekanini bildirib, barcha mutasaddilarni fuqarolar bilan muloqotda qonun ustuvorligi, inson qadri, ijtimoiy tenglik va hamkorlik tamoyillariga rioya qilishga chaqirdi.