Yashnobod tumanida majburiy badal uchun to‘langan mablag‘larni o‘zlashtirgan MCHJ aniqlandi. Bu haqda Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Yashnobod tuman bo‘limi tomonidan tergovga qadar tekshiruv o‘tkazilgan. Unda “K.T.” MCHJ mas’ul shaxslari 2022-yil va 2023-yilning iyul oyiga qadar Tuzel dahasidagi ko‘p xonadonli uylarning mulkdorlari tomonidan majburiy badal uchun to‘langan mablag‘larni o‘zlashtirgan.

Ya’ni, 184 mln so‘mini ish haqi sifatida va 974,7 mln so‘mini turli tovar moddiy boyliklar xaridi uchun sarflanganligi haqida soxta hujjatlarni rasmiylashtirgan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-taroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Soxta hujjat