Jinoyat ishlari bo‘yicha Namangan viloyat sudi apellyatsiya instansiyasining 2026-yil 13-oktabr kuni e’lon qilingan ajrimi bilan Pop tuman sudining ozodlikdan mahrum qilish jazosiga hukm qilingan O. I.ga nisbatan jazo shartli deb belgilandi. Natijada u sud zalida qamoqdan ozod qilindi.

Ma’lum qilinishicha, O. I. 1977-yilda Namangan viloyatida tug‘ilgan bo‘lib, “Rayxon oilaviy milliy taomlari” korxonasi ta’sischisi hisoblanadi. Unga nisbatan jinoyat ishlari bo‘yicha Pop tuman sudining 2026-yil 13-iyuldagi hukmi bilan ozodlikdan mahrum qilish jazosi tayinlangan edi.

Rasmiy axborotga ko‘ra, apellyatsiya instansiyasi ishni ko‘rib chiqishda yetkazilgan zararning bir qismi naqd pul shaklida depozit hisob raqamiga topshirilganini, O. I.ga tegishli mol-mulkning bank talabi asosida bank balansiga qabul qilinishi belgilanganini hamda xatlangan mol-mulklarni sotishdan tushgan mablag‘lar zararni qoplashga yo‘naltirilganini inobatga olgan. Shuningdek, zararni qoplash uchun faqat O. I. va uning yaqin qarindoshlariga tegishli mol-mulklar yo‘naltirilgani qayd etilgan.

Sud ajrimiga ko‘ra, O. I.ga Jinoyat kodeksining 167-moddasi 3-qismi “a” bandi bilan tayinlangan jazo o‘zgarishsiz qoldirilgan, biroq Jinoyat kodeksining 72-moddasiga asosan uch yillik sinov muddati bilan shartli deb hisoblash belgilangan.

Shu tariqa, apellyatsiya instansiyasi qarori bilan O. I. sud zalida qamoqdan ozod etildi.