Toshkent viloyatida yashovchi fuqaroning arizasi asosida uyushgan jinoiy guruh qo‘lga olindi, deb xabar bermoqda IIV matbuot xizmati.

Guruh a’zolari Toshkent viloyatidan Toshkent shahrining Yashnobod tumaniga qatnovchi taksi haydovchilarini qo‘rqitib, o‘zboshimchalik bilan oylik to‘lov joriy qilgan.

Xususan, Toshkent shahrida tug‘ilgan “Buqa”laqabli 37 yoshli Alimqulov Sherzod Umaraliyevich qo‘lga olingan. U muqaddam JKning 277-moddasi (bezorilik) bilan uch marta sudlangan.

Turli sport turlari bilan shug‘ullanib kelgan ushbu fuqaro sheriklari bilan Damas avtomashinasi haydovchisini urib, unga tan jarohati yetkazgan hamda jabrlanuvchining tirikchilik manbai bo‘lgan avtomashina kalitlarini zo‘rlik ishlatib tortib olgan.

Jinoiy guruh doimiy ravishda haydovchilarning yo‘nalish bo‘ylab harakatlanishiga to‘sqinlik qilgan. Shuningdek, ariza muallifi hayoti va sog‘lig‘iga jiddiy zarar yetkazish bilan qo‘rqitilgan hamda Yashnobod tumaniga qatnovlarni amalga oshirish imkoniyati evaziga undan 2 oylik avans sifatida 810 dollar olingan.

Keyinchalik, keyingi to‘lovlarni to‘liq amalga oshira olmaganligi sababli, unga o‘zboshimchalik bilan yo‘nalishga chiqish taqiqlangan.

Mazkur holat yuzasidan jinoiy guruh yetakchisi va uning sheriklariga nisbatan JKning 165-moddasi 2-qismi “v” bandi (bir guruh shaxslar tomonidan oldindan til biriktirib tovlamachilik qilish) bilan jinoyat ishi qo‘zg‘atilgan.

Ushbu jinoiy guruhning xatti-harakatlaridan jabr ko‘rgan fuqarolardan ichki ishlar organlariga murojaat qilishlari yoki 102 raqamiga qo‘ng‘iroq qilishlari so‘raladi.

• Haydovchi
• Jinoyat
• Taksi
• Toshkent
• Yashnobod tumani