Qo‘shma Shtatlarning saylangan prezidenti AQSh va Shimoliy Atlantika alyansining boshqa a’zolari o‘rtasidagi mudofaa xarajatlari o‘rtasidagi farqni “adolatsiz” deb atagan.

“Ular o‘z to‘lovlarini to‘lashlari kerak. Agar bu amalga oshmasa, inauguratsiyadan keyin AQSh-NATO munosabatlarini qayta ko‘rib chiqaman”, — deya ta’kidlagan Tramp NBC News telekanaliga.

Donald Tramp uzoq vaqtdan beri NATOga a’zo davlatlar bir qismi mudofaa ittifoqi kelishuvlarida qayd etilganidek, o‘z yalpi ichki mahsulotning kamida 2 foizini mudofaa xarajatlariga ajratmayotganini tanqid qilib keladi. 

Iqtisodiy Tadqiqotlar Instituti ma’lumotlariga ko‘ra, NATO mamlakatlari orasida Qo‘shma Shtatlardan tashqari, faqat Polsha va Buyuk Britaniya 1990-yildan beri har yili umumiy YaIMning 2 foizidan ortig‘ini mudofaaga sarflaydi. Germaniyada zaruriy mudofaa investitsiyalarining yetishmasligi taxminan 230 milliard yevroni, Italiyada 120 milliard yevroni, Ispaniyada 80 milliard yevrodan ortiqni tashkil qiladi.

Eslatib o‘tamiz, AQShda bo‘lib o‘tgan prezidentlik saylovlarida g‘olib bo‘lgan Donald Tramp 2025-yil 20-yanvardan o‘z faoliyatini boshlaydi.

• AQSh
• NATO
• Tramp
• Yalpi ichki mahsulot