Rossiyaning Mordoviya Respublikasi va Samara viloyatidagi jazoni ijro etish muassasalarida jazo o‘tayotgan O‘zbekiston fuqarosi bo‘lgan ayollarning voyaga yetmagan farzandlari O‘zbekistonga olib kelindi. Bu haqda O‘zbekiston Tashqi ishlar vaziri matbuot kotibi Omonulla Fayziyev ma’lum qildi.

Qayd etilishicha, bolalarni Vatanga qaytarish jarayoni O‘zbekistonning Qozon shahridagi Bosh konsulxonasi tomonidan olib borilgan uzoq muddatli muzokaralar natijasida amalga oshirilgan.

Konsullik xodimlari voyaga yetmaganlarning O‘zbekiston fuqaroligiga mansubligi, mamlakatda ularning qarindoshlari mavjudligi hamda qaytarish uchun zarur bo‘lgan boshqa huquqiy masalalarni o‘rgangan. Shuningdek, Rossiyaning vakolatli idoralariga tegishli hujjatlar taqdim etilib, zarur tartib-taomillar bajarilgan.

Natijada Mordoviyadagi jazoni ijro etish muassasasi hududida joylashgan bolalar uyida bo‘lgan voyaga yetmaganlar Bosh konsulxona diplomatlari va O‘zbekistondan Rossiyaga yuborilgan Ichki ishlar vazirligi xodimlari hamrohligida qabul qilib olinib, O‘zbekistonga qaytarilgan.

TIV ma’lumotiga ko‘ra, Rossiya hududidagi jazoni ijro etish muassasalari qoshidagi bolalar uylarida bo‘lgan O‘zbekiston fuqarolarining voyaga yetmagan farzandlarini Vatanga qaytarish bo‘yicha ishlar tizimli ravishda davom ettirilmoqda.