Sog‘liqli saqlash vaziri Asilbek Xudayarov Xitoy Xalq Respublikasining mamlakatimizdagi Favqulodda va Muxtor elchisi Yuy Szyun bilan uchrashuv o‘tkazdi. Vazirlik matbuot xizmatining xabar qilishicha, uchrashuv davomida xitoylik kardiojarrohlar tomonidan joriy yilda 500 nafar yurak nuqsoni bo‘lgan bemor bolada yuqori texnologik operatsiyalar o‘tkazish bo‘yicha takliflar ko‘rib chiqilgan.

Bu amaliyotlar Bolalar milliy tibbiyot markazi, Respublika ixtisoslashtirilgan xirurgiya ilmiy-amaliy tibbiyot markazi hamda Toshkent davlat tibbiyot universiteti bolalar ko‘p tarmoqli klinikasida bajarilishi ko‘zda tutilgan.

Shuningdek, muloqotda Respublika sud-tibbiy ekspertiza ilmiy-amaliy markazining moddiy-texnik bazasini mustahkamlash, qator tibbiyot muassasalarini modernizatsiya qilish hamda yurtimizda an’anaviy Xitoy tabobatini rivojlantirishga qaratilgan grant loyihalarini amalga oshirish istiqbollari muhokama qilindi.

Bundan tashqari, Xitoyning grant mablag‘lari hisobidan amalga oshiriladigan loyihalarni jadallashtirishga kelishib olindi.

• Hamkorlik
• Jarrohlik
• O‘zbekiston
• Tibbiyot
• Xitoy
• Yurak