25-fevral, seshanba kuni Madaniyat vaziri Ozodbek Nazarbekov va Xalqaro turkiy madaniyat tashkiloti – TURKSOY delegatsiyasi vakillari o‘rtasida uchrashuv bo‘lib o‘tdi, deb xabar bermoqda Madaniyat vazirligi matbuot xizmati.

“Xiva 2020-yil Turk dunyosining madaniy poytaxti" deb e’lon qilinganligi munosabati bilan tashkil etilgan ushbu uchrashuvda TURKSOY tashkiloti bosh kotibi D.Kaseinov, tashkilot mutaxassisi A.Nurmuxammatuli ishtirok etdi.

Tadbirda ma’lum qilinishicha, tadbirning ochilish marosimi Xiva shahridagi Ichanqal’a muzey qo‘riqxonasi hamda Nurillaboy saroyi majmuasida o‘tkazilishi rejalashtirilgan.

Tadbirda YuNESKO, ISESKO, MDH, ShHT kabi xalqaro tashkilotlari vakillari, olimlar, ilmiy-tadqiqot markazlari rahbarlari ishtirok etishi kutilmoqda.

Shuningdek, tadbir davomida O‘zbekiston va xorijiy san’atkorlar ishtirokida konsert dasturi, teatrlashtirilgan sahna ko‘rinishi, TURKSOYga a’zo davlatlarning milliy qo‘shiqlari, musiqa va raqslari ijro etiladi.

Nurillaboy saroy majmuasida esa O‘zbekiston madaniy merosiga bag‘ishlangan virtual ko‘rgazma tashkil etish rejalashtirilgan.

“Tadbirlarni yoritish uchun mamlakatimizda faoliyat yuritayotgan barcha OAVlarni va  xalqaro miqiyosdagi jurnalistlarni ham taklif etish lozim, Xivadagi tadbirlarni butun dunyoga namoyon etishimiz kerak”, deydi O.Nazarbekov.

Vakillar ham “Tadbirlarni yoritgan eng yaxshi jurnalist” nominatsiyasi bo‘yicha mukofotlar e’lon qilinishini ta’kidladi.

Delegatsiya a’zolari bugun Madaniyat vaziri hamrohligida Xivaga jo‘nab ketishadi.