Diniy mazmundagi savollarga qulay va tezkor javob berilishini ta’minlash maqsadida, interaktiv va innovatsion xizmatlarni o‘z ichiga olgan fatvo.uz sayti ishga tushirildi, deb xabar bermoqda Musulmonlar idorasi Matbuot xizmati.

Ma’lum qilinishicha, ushbu saytdan foydalanuvchilar shar’iy masalalarga oid o‘z savollarini saytning “Savol yuborish” bo‘limi orqali yo‘llashlari mumkin. Savol matniga audio, video va suratlarni ilova sifatida taqdim etish imkoniyati ham yaratilgan. 

“Berilgan savollarga fatvo sohasida yetarli bilim, tajriba va yuqori malakaga ega bo‘lgan mutaxassislar tomonidan batafsil javoblar qaytariladi”, deyiladi xabarda.

Saytda “Aqida”, “Poklik”, “Namoz”, “Ro‘za”, “Zakot”, “Xaj va umra”, “Nikoh”, “Taloq”, “Savdo va tijorat”, “Qasam va nazr”, “Ijara”, “Halol-harom”, “Ruhiy tarbiya” va shu kabi dolzarb ruknlar ostida javoblar e’lon qilib boriladi. Kutubxona bo‘limida diniy mazmundagi kitob va risolalar joylab boriladi. Media qismida ulamolarning diniy savollarga bergan video va audio javoblari joylashtirilgan.

Foydalanuvchilar “Izlash” tugmasi orqali o‘zlari uchun zarur bo‘lgan mavzulardagi mavjud shar’iy savol-javoblarni topib, mutolaa qilishlari mumkin.

Eslatib o‘tamiz, 2020-yil 10-mart kunidan e’tiboran mazkur sayt test rejimida o‘z ish faoliyatini boshladi.