АҚШда 2001-йил 11-сентябрь терактларидан кейин Ню Ёрк аҳолиси Жаҳон савдо маркази ҳудудидаги ҳаво сифати бўйича етарлича аниқ маълумот олмагани ҳақидаги янги ҳужжатлар эълон қилинди. Уларда ҳаво таркибида соғлиқ учун хавфли моддалар мавжуд бўлгани қайд этилган. Бу ҳақда Тҳе Неw Ёрк Тимес хабар берди.

Эълон қилинган ҳужжатларга кўра, терактлардан бир неча ой ўтиб ҳам Қуйи Манхеттенда асбест ва бошқа зарарли моддалар аниқланган. 2002-йил июлида, яъни ҳужумлардан қарийб 10 ой ўтганидан кейин ҳам Жаҳон савдо марказидан 1,5 километрдан камроқ масофадаги Жон-стрит биносида асбест излари топилган.

Айрим намуналарда асбест миқдори рухсат этилган меъёрлардан юқори бўлган. Шунингдек, Жаҳон савдо маркази вайроналари яқинида саратон касаллигини келтириб чиқариши мумкин бўлган бензолнинг юқори консентратсияси ҳам аниқланган.

Бироқ ўша пайтдаги Ню Ёрк мери Рудолф Жулиани ҳамда кейинчалик шаҳар раҳбари бўлган Майкл Блумберг ҳаво сифати аҳоли учун хавфсиз эканини билдирган. Расмийлар ўтказилган текширувларда зарарли моддалар миқдори рухсат этилган чегараларда эканини таъкидлаган.

Янги ҳужжатларда эса айрим ҳудудларда соғлиқ учун хавф сақланиб қолган бир пайтда одамларнинг Жаҳон савдо маркази атрофига қайтишига рухсат берилгани кўрсатилган.

Ҳужжатлар 9/11 Ҳеалтҳ Wатч ташкилотининг суд даъвосидан сўнг оммага тақдим этилган. Ташкилот раҳбари Бен Чеватнинг айтишича, расмийлар заҳарли моддалар мавжудлигидан хабардор бўлган, бироқ жамоатчиликка ҳудуддаги ҳаво хавфсизлиги ҳақида бошқа маълумот берилган.

Янги маълумотлар 11-сентябрь терактлари оқибатида соғлиғи ёмонлашган жабрланувчиларга федерал компенсатсия олишда ёрдам бериши ва янги суд даъволарига асос бўлиши мумкин.

Тҳе Неw Ёрк Тимес маълумотларига кўра, кейинги йилларда 11-сентябрь ҳужумлари оқибатида юзага келган касалликлар сабаб вафот этганлар сони терактларнинг ўзида ҳалок бўлган қарийб 3 минг кишидан ҳам ошган бўлиши мумкин.

11-сентябрь воқеаларининг иқтисодий оқибатлари ҳам катта бўлган. Браун университетининг Cостс оф Wар лойиҳаси ҳисоб-китобларига кўра, терактларнинг бевосита иқтисодий зарари 35–109 миллиард долларни ташкил этган. Ҳужумлардан кейинги ҳарбий оператсиялар ва терроризмга қарши кураш билан боғлиқ умумий харажатлар эса 2022-йилга келиб 5,8 триллион долларга етган. Келажакдаги даволаниш ва фахрийларни қўллаб-қувватлаш харажатлари ҳам ҳисобга олинса, бу кўрсаткич қарийб 8 триллион долларга баҳоланган.