Афғонистоннинг Мозори Шариф шаҳрида буюк мутафаккир, давлат арбоби ва шоир Алишер Навоий номи билан аталган чорраҳа очилди ҳамда 16 метр баландликдаги ёдгорлик қурилиши бошланди. Бу ҳақида журналист Толиб Носир ўзининг Facebook ижтимоий тармоғидаги саҳифаси орқали маълум қилган. Шунингдек, Дунё ахборот агентлиги хабарига кўра, Мозори Шариф шаҳридаги Чавки-Қалайи-Ғазиён ҳудудида Алишер Навоий шарафига ёдгорлик қурилиши бошланган.

Тамал тоши қўйиш маросимида Мозори-Шариф ўзбек жамоаси вакиллари, ўзбек тилида ёзувчи шоирлар ва маданият арбоблари, Балх давлат университетининг ўзбек тили ва адабиёти кафедраси профессор-ўқитувчилари, шаҳар маъмурияти, бизнес ҳамжамияти вакиллари, Набизода жамғармаси директори Камол Набизода ва Ўзбекистон консуллиги ходимлари иштирок этган.

Ёдгорлик фойдаланишга топширилгач, у Ўзбекистон ва Афғонистон ўртасидаги маданий-гуманитар ҳамкорликни янада мустаҳкамловчи муҳим рамзий объектдан бирига айланиши кутилмоқда.

• Афғонистон
• Alisher Navoiy
• ёдгорлик