Жиззах вилоятининг Мирзачўл туманида сунъий ҳовузга чўмилишга тушган 3 нафар вояга етмаган қиз чўкиб кетиб, вафот этди. Бу ҳақда сўровга жавобан Бош прокуратура матбуот котиби Ҳаёт Шамсутдинов маълум қилди.

Қайд этилишича, ҳодиса жорий йилнинг 17-июль куни соат 13:00 лар атрофида юз берган. Мирзачўл тумани “Пахтазор” МФЙ ҳудудидаги фермер хўжалиги ер майдонида томчилатиб суғориш учун қазилган сунъий ҳовузга чўмилиш учун тушган 3 нафар вояга етмаган қиз чўкиб кетиб, вафот этган.

Уларнинг икки нафари 17 ёшда, яна бири эса 15 ёшда бўлган.

Вафот этган қизларнинг ўлим сабабини аниқлаш учун суд-тиббий экспертизаси ўтказилган. Туман суд-тиббий экспертиза филиалининг дастлабки хулосасига кўра, уларнинг ўлимига юқори нафас йўлларининг сув билан тўсилиши оқибатида юзага келган механик асфиксия сабаб бўлган.

Билдирилишича, ҳозирда мазкур ҳолат юзасидан Мирзачўл туман прокуратураси томонидан терговга қадар текширув ҳаракатлари олиб борилмоқда.