АҚШ пойтахти Вашингтон шаҳрида Озарбайжон Президенти Илҳом Алиевнинг ташрифи чоғида намойишчилар ва давлат раҳбарининг хавфсизлик ходимлари ўртасида можаро юзага келгани ҳақида хабарлар тарқалди. Ҳодиса президент “Тинчлик кенгаши” йиғилишида иштирок этиш учун ташриф буюрган пайтда, Пенсилвания проспектидаги Valdorf Astoria меҳмонхонаси яқинида содир бўлган.

The Washington Post нашрининг ёзишича, намойишчилар Озарбайжондаги сиёсий маҳбусларни озод қилиш талаби билан чиқишган. Айрим фаоллар президент қўриқчилари томонидан жисмоний куч ишлатилганини даъво қилиб, жароҳат олганликларини маълум қилган. Уларнинг айтишича, камида бир неча киши турли даражада тан жароҳати олган.

Колумбия округи полицияси вакиллари мазкур ҳодисада Озарбайжон хавфсизлик ходимлари иштирок этгани ҳақидаги маълумотларни тасдиқлаб, материаллар текширув учун АҚШ Давлат департаментига тақдим этилганини билдирган.

Шу билан бирга, Озарбайжон томони воқеага нисбатан бошқача изоҳ берган. Расмий манбаларга кўра, президент кортежи меҳмонхона ҳудудига яқинлашган вақтда бир гуруҳ шахслар қўриқланадиган ҳудудга киришга уринган ҳамда транспорт воситасининг ҳаракатига тўсқинлик қилишга ҳаракат қилган. Элчихона баёнотида бу ҳолат жиддий хавфсизлик таҳдиди сифатида баҳоланиб, хавфсизлик ходимлари амалдаги қоидаларга мувофиқ чоралар кўришга мажбур бўлгани таъкидланган.

Дипломатик миссия вакиллари барча ҳаракатлар фақат давлат раҳбари хавфсизлигини таъминлаш мақсадида амалга оширилгани ҳамда мезбон давлат идоралари билан мувофиқлаштирилган ҳолда бажарилганини қайд этган. Шунингдек, Озарбайжон оммавий ахборот воситаларида ҳодиса олдиндан режалаштирилган провокация бўлиши мумкинлиги ҳақидаги тахминлар ҳам илгари сурилган.

АҚШ Конгресси аъзоси Франк Паллоне эса ижтимоий тармоқларда воқеага муносабат билдириб, пойтахт кўчаларида намойишчиларга нисбатан куч ишлатилиши ҳолати юзасидан текширув ўтказилиши зарурлигини таъкидлаган.

Ҳозирда воқеа юзасидан текширув жараёнлари давом этмоқда. Расмий идоралар барча тафсилотларни аниқлаш ва ҳодисага ҳуқуқий баҳо бериш бўйича иш олиб борилаётганини маълум қилган.

• АҚШ
• Илҳом Алиев
• Муштлашув
• Ташриф