Россия Тергов қўмитаси раиси Александр Бастрикин мамлакатда ўлим жазосига қўйилган мораторийни бекор қилишга чақирди. Унинг сўзларига кўра, бунинг учун Конституцияни ўзгартириш ва референдум ўтказиш шарт эмас — президент Владимир Путиннинг фармони етарли бўлади.

Бастрикиннинг фикрича, Россияда “оғир жиноятлар сони ортиб бораётганини” ҳисобга олиб, ўлим жазосига қўйилган мораторийни олиб ташлаш керак. “Бу, биринчи навбатда, иқтисодий сабабларга кўра амалга оширилиши керак, чунки давлат маҳбусларни қамоқда сақлаш учун кўп пул сарфлашга мажбур”, – деди у.

Бундан ташқари, Бастрикин халқаро ёшлар ҳуқуқий форумида сўзлаган нутқида маҳбуслар учун қилинадиган харажатларни санаб ўтди. Унинг сўзларига кўра, битта маҳкумни сақлаш учун йилига камида 30 минг рубль кетади.

Бастрикин, шунингдек, ўлим жазосини қайтариш таклифини инсонийликка интилиш билан изоҳлади. Шунингдек, у “Менимча, маньяк 70, 80, 100 кишини ўлдирганида ва у энг юқори жазога ҳукм қилинганида, бу жуда инсоний қарор бўлади”, — дея хулоса қилди. Crocus City Hall’даги 145 киши қурбон бўлган терактни мисол қилиб келтирди.

Россияда ўлим жазоси 1997 йилдан бери қўлланмайди.

• O'lim jazosi
• Россия