Тошкент вилоятининг қатор мактабгача таълим ташкилотларида болалар заҳарланиши билан боғлиқ ҳолат юзасидан Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков ахборот берди.

Унга кўра, жами 1922 нафар бола, жумладан, беморлар билан мулоқотда бўлганлар ҳам тиббий кўрикдан ўтказилган. Улардан 959 нафарида клиник белгилар кузатилмагани сабабли уйларига жавоб берилган. Кейинги давр мобайнида яна 269 нафар бола соғайиб, уйига қайтарилган.

Ҳозирги кунда 694 нафар бола шифохоналарда даволанмоқда, улардан 13 нафарининг аҳволи ўртача оғирликда баҳоланмоқда. Бугунги кунда яна 421 нафар боланинг аҳволи яхшилангани боис уйларига жавоб берилиши режалаштирилмоқда.

Бемор болаларга малакали ёрдам кўрсатиш мақсадида Тошкент шаҳридаги ихтисослаштирилган муассасалардан 100 дан ортиқ олим ва мутахассис жалб этилган. Уларнинг саъй-ҳаракатлари билан даволаш жараёнлари замонавий стандартларга мувофиқ олиб борилмоқда.

Вазирлик ҳузурида ташкил этилган штаб хулосасига кўра, болаларга ўткир гастроэнтерит ташхиси қўйилган. Мазкур касаллик оғир ёки ҳаёт учун хавфли тоифага кирмайди ва одатда асоратсиз ўтиб кетади.

Санитария-эпидемиологик осойишталик ва жамоат саломатлиги қўмитаси томонидан жойларда эпидемиологик суриштирув ишлари давом эттирилмоқда. Олинган намуналарнинг лаборатория текширув натижалари бўйича қўшимча ахборот берилиши маълум қилинди.

Қўшимча қилинишича, дори воситаларининг етарли захираси яратилган, барча болаларнинг соғлиғи давлат назоратида. Айбдор шахсларнинг жавобгарлиги эса ҳуқуқий тартибда баҳоланади.

Дастлабки тахминларга кўра, болалар соғлиғидаги ўзгаришларга сифатсиз сут маҳсулотлари сабаб бўлган.

• Болалар боғчаси
• Nurmat Atabekov
• SSV
• Toshkent viloyati
• Заҳарланиш