“Microsoft” асосчиси Билл Гейтс ўзининг деярли бутун бойлигини хайрия ишларига беришни режалаштираётганини айтди. Бу ҳақда у ўзининг Twitter'ида ёзган.

“Мен бойлигимнинг деярли барчасини фондга беришни режалаштиряпман. Мен пастга тушаман ва охир-оқибат дунёдаги энг бой одамлар рўйхатидан чиқаман”, – дейди миллиардер ўз мурожаатида.

Қайд этилишича, унинг бойлиги ўзининг хайрия жамғармаси Гейтс фондига ўтади. Яқин ойда у жамғарма фаолияти кўламини кенгайтириш учун унга 20 миллиард АҚШ доллари миқдоридаги пулларни ўтказади.

“Мен ўз ресурсларимни жамиятга азоб-уқубатларни камайтириш ва ҳаётни яхшилашга энг катта таъсир кўрсатадиган усуллар билан бермоқчиман. Умид қиламанки, жуда бой ва имтиёзли лавозимдаги қолган одамлар ҳам шу дақиқадан, ушбу масалада пешқадамликка ўтишади”,– дейди Гейтс.

Шунингдек, “Microsoft” асосчиси, жамғарма Билл ва Мелинда Гейтсларнинг номларига эга бўлса-да, унинг маблағларининг ярми инвестор Уоррен Баффет томонидан тақдим этилганини таъкидлаган.

“Мен унинг дўстлиги ва етакчилигини қанчалик қадрлашимни ҳеч қачон етарли даражада ифода эта олмайман”, деб ёзган Гейтс.

Маълумот учун, Билл ва Мелинда Гейтс жамғармаси 2000 йилда “Microsoft” асосчиси томонидан ташкил этилган. У Қўшма Штатлардаги энг йирик хусусий фонд ҳисобланади, унинг активлари 50,7 миллиард долларга баҳоланади.

Жамғарманинг асосий фаолияти соғлиқни сақлаш тизимини такомиллаштириш, шунингдек, учинчи дунё мамлакатларида очарчиликни бартараф этишдан иборат. Бундан ташқари, у ОИВ / ОИТС, сил, безгакнинг олдини олиш ва даволаш билан шуғулланади ва Африка ва Ҳиндистонда болаларни эмлаш бўйича лойиҳаларни бошқаради.

АҚШда эса Гейтс жамғармаси таълим тизимини қўллаб-қувватлаш ва такомиллаштиришга бағишланган.

• Bill Geyts
• Дунё
• Хайрия
• миллиардерлар