Қозоғистоннинг Астана шаҳри мезбонлик қилган бокс бўйича World Boxing ташкилоти кубогининг ҳисоб бўйича учинчи турнири якунига етди.

Мусобақада иштирок этган Элшод Расулов бошчилигида Ўзбекистон аёллар терма жамоаси 1 та олтин ва 4 та бронза медалига эга чиқди. -65 кг вазнда Ўзбекистон шарафини ҳимоя қилган Навбаҳор Ҳамидова шоҳсупанинг энг юқори поғонасига кўтарилди.

У финал жангида Олимпиада чемпиони, уч карра жаҳон чемпиони, туркиялик Бусеназ Сурменелини 5:0 ҳисобида мағлубиятга учратди. Бу билан Навбаҳор жаҳон чемпионати финалидаги мағлубият учун Бусеназдан реванш олди. Шунингдек, Ҳамидова World Boxing кубогида чемпионликка эришган биринчи ўзбек аёл боксчиси бўлди.

Ғолиб ва совриндорлар:

Олтин медаль

-65 кг. Навбаҳор Ҳамидова.

Бронза медаллар

-54 кг. Феруза Казакова;

-75 кг. Азиза Зокирова;

-80 кг. Соҳиба Рўзметова;

+80 кг. Олтиной Сотимбоева.

• Бокс
• Жаҳон кубоги
• Қозоғистон