Бироз аввал “Олимпия” стадионида Ўзбекистон миллий терма жамоаси “CАFА Nations Cup-2025” мусобақаси доирасидаги Туркманистонга қарши беллашувни ўтказди.

2:1 ҳисобида якунланган ўйинда вакилларимиз ниҳоятда қийин ғалабага эришди. Даставвал Игор Сергеев Руслан Жияновнинг узатмасидан кейин 37-дақиқада ҳисобни очган бўлса, бўлим сўнгида унинг ўзи пенальтидан яна бир тўп киритиб, ҳисобни ишончли кўринишга келтирди.

Беллашувнинг 59-дақиқасидан бошлаб, терма жамоамиз бир киши кам бўлиб ҳаракат қила бошлади. Фарруҳ Сайфиев рақиб дарвозабони тўпни ушлаб олиб бўлгандан кейин унга қарши қўпол ҳаракат қилди ва ҳакам томонидан тўғридан-тўғри майдондан четлатилди.

Шундан кейин ҳамюртларимиз асосан қарши ҳужумларда ўз омадини синаб кўришга ҳаракат қилди. Аммо туркманистонлик футболчилар ҳам мудофаада ишончли ўйин кўрсатди.

Қарама-қаршилик якунланиши арафасида қўшниларимиз пенальти ишлаб олди ва Турдиев ундан унумли фойдаланди. Ҳисоб бошқа ўзгармади ва якунда термамиз қимматли уч очкони қўлга киритди.

Энди кейинги турда Ўзбекистон худди шу стадионда Қирғиз Республикаси билан тўқнаш келса, Туркманистон Уммон билан баҳс олиб боради.

• Футбол
• Спорт
• терма жамоа
• musobaqa