Бугун, УЭФА Чемпионлар Лигаси чорак финалининг дастлабки учрашувларига старт берилади. 1/4 финалнинг энг марказий баҳси дея эътироф этилаётган ўйинда “Арсенал” ўз уйида “Реал Мадрид”ни қабул қилади.

Микел Артета бошчилигидаги “тўпчилар” сўнгги босқичда ПСВ жамоасини умумий 9-3 ҳисобида мағлуб этиб, чорак финалга йўл олган эди. Бироқ, жамоа АПЛда жароҳатлар сабаб кўплаб қийинчиликларга дуч келмоқда. Жумладан, муҳим ўйинчилардан Жесус, Стерлинг, Ҳавертз, Габриэл, Калафиори ва Томиясу жароҳатлар туфайли ўйинда иштирок эта олмайди. Шунингдек, баъзи футболчилар кейинги учрашув учун дисквалификация хавфи остида. Шунга қарамасдан “Арсенал” учун муҳим жиҳат бу Букаё Сака жароҳатдан сўнг сафга қайтганидир. Ҳужумчи муҳим ўйинда жамоасига ёрдам беришга тайёр.

Анчелотти шогирдлари 1/8 финалда ҳамшаҳарлари “Атлетико”ни пенальтилар сериясида мағлуб этиб, ушбу босқичга етиб келди. Аммо, жамоа яқинда Ла Лигада “Валенсия”га қарши ўйинда кутилмаган “тарсаки”ни қабул қилиб олди (1:2). “Қаймоқранглилар” учун яхши хабар шундаки, дарвозабон Куртуа жароҳатдан қайтди. Мбаппе ва Рюдигер эса УЭФА томонидан бўлган дисквалификация таҳдидига қарамай, ўйинда иштирок этишлари мумкин. Чоуамени сариқ карточкалари кўпайиб кетганлиги боис биринчи ўйинни ўтказиб юборади.

Тарихийга назар солсак “Реал Мадрид” ҳеч қачон “Арсенал”ни расмий ўйинларда мағлуб эта олмаган.

Жамоалар ўртасидаги сўнгги учрашувда, 2005/06-йилги Чемпионлар Лигаси доирасида, “Арсенал” икки ўйин натижасига кўра умумий 1-0 ҳисобида ғалаба қозонган.

Бугун, шунингдек, ЕЧЛ чорак финалидан ўрин олган “Бавария” ва “Интер” жамоалари ўртасидаги баҳс ҳам бўлиб ўтади. Ушбу икки жамоа Еврокубокларда умумий 9 маротаба тўқнаш келган, шундан 5 тасида мезбонлар, 3 тасида миланликлар устун келган ва яна бир ўйин дуранг билан якунланган.

Бугунги учрашувларнинг ҳар иккиси 23:59 да старт олади.

Тайёрлади: Азимжон Шодмонов

• Арсенал
• Бавария
• Чемпионлар Лигаси
• Футбол
• Интер
• Real