31°
Кечаси 18°
Экология қўмитаси бевосита президентга ҳисобдор ҳисобланади. Бу ҳақда президентнинг тегишли қарори қабул қилинди.
Қўмита ўз фаолиятини ҳар қандай давлат органлари ва ташкилотлари, уларнинг мансабдор шахсларидан мустақил равишда амалга оширади. Унинг фаолиятига ушбу мансабдор шахсларнинг аралашуви тақиқланади.
Қонуности ҳужжатларида белгиланган экология соҳасидаги ҳукуматнинг ваколатлари, уларга тегишли ўзгартиришлар киритилгунгача Экология қўмитаси томонидан амалга оширилади.
Қўмита раисининг 4 нафар ўринбосари президент томонидан лавозимга тайинланади ва лавозимидан озод этилади. Мақоми, меҳнатга ҳақ тўлаш, тиббий хизмат ва транспорт таъминоти шароитлари бўйича тегишли равишда президент маслаҳатчиси ўринбосарларига тенглаштирилади.
Экология қўмитасининг мансабдор шахслари учун аввалги иш жойида берилган узоқ муддатли хизматлари, ҳарбий ва махсус унвонлар (мартаба даражалари, малака даражалари, дипломатик даражалар ва бошқалар) учун устама ва қўшимча тўловлар сақланиб қолади. Қўмитада ишланган давр ҳарбий ва махсус унвонларни бериш учун зарур бўлган иш стажига қўшилади.
2026 йил 1 сентябргача Экология жамғармаси маблағлари ҳисобидан Ягона экологик онлайн платформа фаолияти йўлга қўйилади.
Атроф-муҳитга таъсир кўрсатиш бўйича I ва II тоифага мансуб саноат корхоналари 2026 йил 1 мартгача ўз ҳудудларида фон мониторинг станцияларини ўрнатади ва уларни Экологик мониторинг миллий марказига интеграция қилади.
Ушбу санадан бошлаб белгиланган муддатда фон мониторинг станцияларини ўрнатмаган ва уларни интеграция қилмаган корхоналарга нисбатан компенсация тўловларини беш бараварга оширилган ҳолда қўлланади.
Экополитсия ходимларига жисмоний куч ишлатиш, махсус воситаларни (электрошок қурилмаларини) ва хизмат қуролини (резина ўқли, тўр отувчи) қўллаш ҳуқуқи берилади ҳамда уларнинг махсус кийимига боди камералар ўрнатилади.
Солиқ мобил иловаси орқали жисмоний шахсларга харид суммасининг бюджетдан қайтариладиган қисми ихтиёрий равишда дарахт кўчатларини экишга йўналтириш имконияти яратилади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
