Кеча, 27 февраль, оқшомида ФИФА талқинига кўра, мавсумнинг энг яхшиларига The Best совринлари топширилди.

Унга кўра, ПСЖ клуби ва Аргентина терма жамоаси ҳужумчиси Лионел Месси «Йилнинг энг яхши футболчиси» сифатида эътироф этилди.

Ушбу совринга, Франциялик футболчилар Килиан Мбаппе (ПСЖ) ва Карим Бензема (Реал) ҳам даъвогарлик қилган эди.

«Йилнинг энг яхши мураббийи» номига Аргентина терма жамоаси бош мураббийи Лионел Скалони муносиб топилди. Ушбу мақомга даъвогарлар учлигидан Карло Анчелотти («Реал») ва Хосеп Гвардиола («Манчестер Сити») ўрин олган эди.

Ўз навбатида, Йилнинг энг яхши дарвозабони» номинациясида ғолиблик Аргентина терма жамоасининг яна бир вакили, Эмилиано Мартинес («Астон Вилла»)га насиб этди.

Бу борада Мартинес Тибо Куртуа («Реал», Бельгия) ва Яссин Буну («Севиля», Марокаш) ни ортда қолдирди.

Йилнинг энг чиройли голи муаллифига топшириладиган «Пушкаш соврини»га полшалик Марчин Олекси лойиқ кўрилди.

Шу билан бирга, «Йилнинг энг яхши аёл футболчиси» номига Алексия Путеляс («Барселона», Испания) сазовор бўлди.

ФИФА ва ФИФПро талқинига кўра йил рамзий терма жамоаси қуйидагича кўриниш олди.

Дарвозабон: Тибо Куртуа («Реал», Бельгия);

Ҳимоячилар: Ашраф Ҳакими («ПСЖ», Марокаш), Жоау Канселу («Манчестер Сити», Португалия), Виржил ван Дейк («Ливерпул», Нидерландия);

Ярим ҳимоячилар: Кевин де Брюйне («Манчестер Сити», Бельгия), Лука Модрич («Реал», Хорватия), Каземиро («Манчестер Юнайтед» / «Реал», Бразилия);

Ҳужумчилар: Лионел Месси («ПСЖ», Аргентина), Килиан Мбаппе («ПСЖ», Франция), Карим Бензема («Реал», Франция), Эрлинг Ҳоланд («Манчестер Сити» / «Боруссия Д», Норвегия).

• FIFA
• Футбол
• The Best