Ғазо секторида октябрь ойининг бошида ўт очишни тўхтатиш эълон қилингандан сўнг камида 67 нафар бола ҳалок бўлган, яна ўнлаб болалар яраланган. Бу ҳақда БМТнинг Болалар фонди (ЮНИСЕФ) расмий вакили Рикардо Пирес маълум қилди.

"Кеча Ғазо шаҳрида 7 бола ўлдирилгани ҳақида хабарлар олдик. 11 октябрдан бошлаб Ғазо секторида камида 67 бола ҳалок бўлди, ўнлаб болалар яраланди. Бу шуни англатадики, сулҳдан кейин кунига 2 бола ҳалок бўлмоқда", — деди у Женевада ўтказилган брифингда.

Рикардо Пирес, шунингдек, яқинлашаётган совуқ ҳам болалар соғлиғи учун хавф туғдириши, уларнинг кўпи ҳанузгача чодирлар ёки вақтинчалик бошпаналарда яшаётганлиги, ҳатто, оилаларда ёпинчиқ ҳам етишмаслигини таъкидлаган. Унинг айтишича, бу ҳолат нафас йўллари инфекциялари кўпайишига  олиб келади. “4000 га яқин бола ҳали ҳам шошилинч тиббий эвакуацияга муҳтож”, — дея қўшимча қилган ЮНИСЕФ расмий вакили.

10 октябрда сулҳ эълон қилингандан кейин Исроил Мудофаа Армияси (ИДФ) Ғазо секторига бир неча бор зарбалар берган. ИДФ матбуот хизмати бу чоралар ўт очишни тўхтатиш режимини Фаластин томони бузганлиги билан изоҳланганини билдирган.

Ғазо сектори расмийларининг статистик маълумотларига кўра, сулҳ кучга кирганидан буён исроиллик ҳарбийлар ўт очишни тўхтатиш режимини 280 мартадан ортиқ бузган. Бу ҳаракатлар натижасида 312 киши ҳалок бўлган, яна 760 киши жароҳатланган.

• Болалар
• Фаластин
• Isroil