Кеча, 3 январь куни Германия ва Франция Ташқи ишлар вазирликлари раҳбарлари Анналена Бербок ва Жан-Ноэл Барро Европа Иттифоқи номидан Сурияга ташриф буюрди.

Улар ҳокимиятнинг амалдаги раҳбари Аҳмад ал-Шараа (Абу Муҳаммад ал-Жўлоний), шунингдек, Сурия фуқаролик жамияти вакиллари билан музокаралар ўтказди ва Европа Иттифоқи Сурияда ҳокимиятнинг тинч ва инклюзив тарзда ўзгариши тарафдори эканини билдирди. Бербок ва Барро Башар Асад режими қулагандан кейин Дамашққа ташриф буюрган биринчи Европа ташқи сиёсат идоралари раҳбарлари бўлди.

Улар Дамашқ яқинида жойлашган Башар Асад режимининг ваҳшийликлари тимсолига айланган Сайдная қамоқхонасига ташриф буюрди. Маълумотларга кўра, ҳукумат алмашганидан кейин 4000 дан ортиқ маҳбус озод этилган.

Дамашқда сўзлаган Барро “суверен, барқарор ва тинч” Сурия давлати қурилишига умид билдирган. Бербок эса Германия Суриянинг “ишлаётган давлат”га айланишига ёрдам бермоқчи эканлигини таъкидлаган. Сурияда ҳокимият тепасига келган, “Ал-Қоида”нинг Суриядаги бўлими билан боғланган ва кўплаб давлатлар томонидан террорчи ташкилот сифатида таснифланган “Ҳаят Таҳрир аш-Шом” (ҲТШ) ташкилотига нисбатан “шубҳали қарашларга” қарамай, Бербок Сурия халқини ушбу муҳим чорраҳада қўллаб-қувватлаш имкониятини бой бермаслик кераклигини айтган. Унинг сўзларига кўра, Берлин “ҳокимиятнинг инклюзив ва тинч йўл билан ўтказилишини” ҳамда Сурияда фуқаролик ярашувини қўллаб-қувватлашга тайёр.

Бербок Суриянинг янги маъмуриятини “аҳоли гуруҳларига қарши қасос олиш ҳаракатлари”, сайловларни кечиктириш ҳамда суд ва таълим тизимини “исломлаштириш” уринишларидан қочишга чақирди.

• Германия
• Suriya
• ТИВ
• Yevropa Ittifoqi