Der Spiegel журналнинг ёзишича, мамлакат мудофаа вазири Исраэл Кац Ғазо секторининг жанубида жойлашган Рафаҳ шаҳри харобалари ўрнида атиги 60 кун ичида “гуманитар шаҳар” деб аталувчи мажмуани қуришни буюрган. Унинг фикрича, бу режа орқали икки йилдан бери гуманитар фалокатда яшаётган фаластинликлар устидан ХАМАС ҳаракатининг назоратини заифлаштириш мумкин бўлади.

Мазкур режага кўра, лагерга Исроил армияси эмас, балки “халқаро ҳамкорлар” раҳбарлик қилади, бироқ режада уларнинг кимлиги очиқланмаган. Бунда Исроил мудофаа кучлари (ЦАХАЛ) лагерь атрофида “хавфсизликни таъминлаб туради”.

Ушбу ҳудудга олиб келинадиган одамлар ХАМАС аъзоларининг кириб келишини олдини олиш учун махсус текширувлардан ўтказилади. Каснинг таъкидлашича, лагерга киришга рухсат этилганлар ундан ташқарига чиқа олмайди.

Инсон ҳуқуқлари бўйича исроиллик ҳуқуқшунос Майкл Сфард The Guardian газетасига берган изоҳида бу режа “инсониятга қарши жиноят” эканини таъкидлаган.

Ҳозирда Ғазо секторида икки миллиондан ортиқ одам яшайди. Уларнинг аксарияти 2023 йил 7 октябрда Исроилга уюштирилган террорчилик ҳужумидан сўнг ХАМАСга қарши бошланган уруш оқибатида ўз уйи ва турар жойларидан айрилган.

• Фаластин
• Isroil
• хабар