Кийим жавони тўлиб-тошган, кийишга эса ҳеч нарса йўқ – бу аёллар ва қизларнинг кўп такрорлайдиган гапларидан бири. Бироқ, бу ердаги асосий муаммо жавонда кийишга арзийдиган чиройли либослар йўқлигида эмас, уларни керакли усулда уйғунлаштира олмасликда бўлади. Биз бугун кундалик образларингизга ранг-баранглик бағишлаш ва ҳар доим чиройли образлар яратишга ёрдам берадиган усулларни сиз билан ўртоқлашамиз.

1-вариант. Классик либослар

Эркакларнинг классик услубдаги либосларига ўхшаб кетадиган кийимлар ҳозирда урфга кирган. Бундай либосларнинг қайси бирлари кундалик образларга кўпроқ мос келишини кўриб чиқамиз:

– пиджак – тўғри бичимга эга бўлган ва узунроқ қилиб бичилган, ортиқча безаклар билан ишлов берилмаган бундай либосни топиш қийинроқ бўлиши мумкин. Шунинг учун ҳам уни эркаклар бўлимидаги либослар орасидан қидириб кўрсангиз бўлади. Оддий бичимдаги қора пиджак нафис кўйлак, кундалик образ асосини ташкил қилувчи жинси ва оқ футболка билан аъло даражада уйғунлашади.

– оқ кўйлак – бу ҳам гардеробнинг асосий либосларидан бири ҳисобланади. Уни ҳар қандай услубга хос либослар билан бирга кийишингиз мумкин, энг муҳими фантазияни ишга солиш керак.

– сокин рангдаги толстовка – спорт услубидаги либослар замонамиз аёлларининг гардеробидан жой олганидан кейин толстовкаларга бўлган талаб ҳам ошиб кетди. Гардеробингизда ҳар доим унинг кулранг, қора ёки оқ рангдаги моделларидан бири бўлсин. Толстовкани нафақат жинси, балки кундалик услубга хос кўйлаклар ва жиддий услубдаги костюмлар билан ҳам кийса бўлади.

2-вариант. Бир ҳил рангдаги либослар

Турли ҳил рангдаги либосларни ўзаро уйғунлаштириш охирги бир неча мавсумда урфга кирган бўлса ҳам, total black ҳалигача ўз долзарблигини йўқотмаган. Бир ҳил рангдаги либослардан умумий образ яратиш орқали ҳашаматли кўринишга эришиш мумкин. Бу ердаги энг муҳим нарса – бир нечта ўзига хосликларни билиб олиш.

Биринчи навбатда бир ҳил ранглардан ташкил топган образ асосидаги либосларни кўриб чиқамиз. Улар битта рангнинг бир нечта тусларида бўлиши мумкин. Мисол учун, оч жигарранг кўйлакни қаҳваранг юбка билан уйғунлаштириш ажойиб ва ёрқин натижа олишга ёрдам беради. Туфли ёки ботинканинг ранги либослар рангига мос келиши шарт эмас. Уларнинг ёрқин рангдагисини танласангиз ҳам бўлади.

Ҳар ҳил тузилишга эга бўлган либослардан яратилган аутфит ҳам қизиқарли кўринади. Мисол учун шойи матосидан тикилган кўйлакни тўқилган свитер, тивит костюм, шифон блуза ёки жинси билан уйғунлаштирса бўлади. Матолар борасида исталганча тажрибалар ўтказиш мумкин, муҳими якуний натижа ажойиб бўлсин!

3-вариант. Қора кўйлак

Универсал образлар асосини ташкил қиладиган бундай кўйлак ҳар бир аёл гардеробидан жой олиши керак. Фикримизга қарши чиқишга шошилманг. Қора кўйлакни ўзингизга ёқадиган узунлик ва бичимда танлашингиз мумкин. Кимгадир мини ёқса, кимдир миди ёки максини хуш кўриб кияди. Энг муҳими, либос сизга ярашиб туриши ва қулай бўлиши лозим. Қора кўйлак сотиб олишда унинг универсал бичимда бўлишига эътибор беринг, бундай кўйлакни ресторандаги кечки овқатга ҳам, иш бўйича учрашувга ҳам кийиб кетиш мумкин.

Эътибор беринг: Либоснинг кўринишини пойабзал ёки аксессуарлар ёрдамида ўзгартириб юбориш мумкин. Мисол учун casual услубидаги образ учун оқ кеда кийиб, аутфитни кичик рюкзак билан тўлдиринг. Романтик услубдаги образни эса пошнали оёқ кийим, клатч ва узун зираклар ёрдамида яратиш жуда осон. Иш бўйича учрашувга кетаётган бўлсангиз, образингиз қора кўйлак, жакет, классик услубдаги пойабзал, сумка ва кумушранг соатдан иборат бўлсин.

4-вариант. Турли мавсумларга хос либосларни бирлаштириш

Турли мавсумларга хос либосларни битта образда бирлаштириш ажойиб натижа бериши мумкин. Албатта, қалин шуба билан усти очиқ оёқ кийим кийинг демаймиз. Аммо, қайиқча услубидаги туфли билан тренчни ёки ҳарир кўйлакни уйғунлаштириш ёмон фикр эмас. Бундай комбинациялар образингизга ўзига хослик бағишлаш билан бирга дидингиз қанчалик нозик эканлиги ҳам кўрсатади.

Ёзги кўйлакларни водолазка билан кийиш ҳам мумкин. Ҳар бир либосдан ноодатий образлар яратиш учун максимал фойдаланинг. Ўртача қалинликдаги свитерларни баҳорнинг ёмғирли кунларида ҳарир кўйлак устидан кийиб олишингиз мумкин, шифонли сарафан ҳам водолазка билан аъло даражада уйғунлашади. Бундай образ куз фаслига ҳам, баҳор ва қишга ҳам мос келади, энг муҳими керакли пойабзал ва устки либосни танлаб олиш. Кўйлак тагидан кўриниб турмайдиган узун этиклар ёки икки томонламали кўйлаклар ҳам ушбу образга мос келади.

5-вариант. Simple things

Кўпчилик қизлар машҳур юлдузларга тақлид қилишади. Хейли Бибер ёки Рози Хантингтон Уайтлидек нафис образлар яратишни ким ҳам истамайди дейсиз? Бироқ, оддий аутфитлар ҳам юлдузларнинг либосларидан кам кўринмаслиги мумкин. Бойфренд жинси ва қора водолазка ана шундай либослар сирасига киради. Агар кўча салқинроқ бўлса, унинг устидан чарм пальто ёки классик услубдаги оч жигарранг тренч кийиб олишингиз мумкин.

Балки бу либослар гардеробингизда аллақачон бордир ҳам. Уларни ўзаро уйғунлаштириб кўришга ҳаракат қилинг. Гўзаллик – оддийликда деган гап бежизга айтилмаган. Қора водолазка ва жинси уйғунлигини бунинг яна бир исботи бўлади.

6-вариант. Жинсининг кўпи бўлмайди

Жинсини худди шу матодан тикилган куртка билан бирга кийсангиз энг замонавий образни яратган бўласиз. Бундай образ ҳақида кўп ўйлаш ҳам шарт эмас, муҳими ранглар бир-бирини "бўғиб" қўймаса бўлгани. Агар кўринишингиз зерикарли бўлиб қолишини истамасангиз, хорижлик юлдузларга қараб илҳом олишингиз мумкин. Мисол учун, Гвен Стефани жинси комбинезонни шаффоф ботильон ва ўзгача принтга эга бўлган куртка билан кийишни хуш кўради. Жинси юбкани оқ блуза ёки жинси кофта билан уйғунлаштириш мумкин. Бу хонанда Бейонсенинг севимли образларидан бири.

7-вариант. Оқшом либосини кундалик кийимлар билан уйғунлаштирамиз.

Замонавий мода олами жуда тез ривожланяпти, авваллари бузилиши мумкин бўлмаган деб ҳисобланган қоидаларни бугун дизайнерларнинг ўзлари ўзгартиришяпти. Классик услубдаги костюм-шимни кеда билан, толстовкани романтик услубдаги кўйлак билан, қаламча услубидаги юбкани ноодатий пойабзаллар билан ҳам кийиш мумкин. Стилистлар ва дизайнерлар оқшом образларига хос кийимларни кундалик уст-бошлар билан кийиш мумкин эканлигини айтишяпти.

Шундай экан, пистонлар ва мунчоқлар билан безатилган юбкани оқ блуза ва кроссовка, жинси шим ва спорт услубидаги футболкани ялтироқ зираклар, шойи матосидан тикилган калта оқшом кўйлагини эркин бичимдаги шим билан кийишга асло иккиланманг.

8-вариант. Камар тақинг
 

Камар тақишингиз билан ҳар қандай образ аввалги кўринишига нисбатан яхшироқ бўлади. Ушбу аксессуар бел соҳасида урғу бериб, образнинг ўзига хос безаги бўлиб хизмат қилади. Оддий кўринишдаги, ортиқча безаклари бўлмаган ва ўрта қалинликка эга камарни узунроқ жакет устидан тақиб олсангиз, замонавий аутфит яратилади. Корсет кўринишидаги камар эса қаламча услубидаги кўйлакларга мос келади. Ингичка камарларни эркин бичимли кўйлаклар ва кенг свитерлар устидан тақиш мумкин.

• Фойдали
• мода
• қизиқарли
• тренд